GALURA.CO.ID- Bupati Bandung Dadang Supriatna ngaluuhan Pembukaan Pesantren Kilat Kepala Desa dan Lurah Angktatan III sakabupaten Bandung taun 2023 di Pontren Asy Syifaa Wal Mahmuudiyyah Kecamatan Pamulihan Kabupaten Sumedang, Senen 18 Desember 2023.
Pesantren kilat dilaksanakeun pamarentah Kabupaten Bandung palebah dieu Dinas Pemberdayaan Masyarakat dan Desa (DPMD) rukun gawè jeung Fakultas Psikologi Universitas Islam Negeri (UIN) Sunan Gunung Djati Bandung.
Ceuk Dadang Supriatna, para kepala desa jeung lurah di Kabupaten Bandung panutan masarakat di masing-masing desa jeung kalurahan.
Baca Juga: Wakil Bupati Bandung Sahrul Gunawan Ngapresiasi PORAK SMA Negeri 1 Baleendah Kabupaten Bandung
Tina kituna dina pelaksanaan pamarentahan dipiharep luyu jeung aturan pikeun nyinglar hal-hal nu teu dipiharep, utamana dina ngokolakeun keuangan.
Dadang Supriatna miharep ka sakumna para kepala desa ngalakukeun capacity building bisa dihartikeun proses ngaronjatkeun kamampuan pangawaruh jeung kaparigelan (skil), sikep (attitude), jeunh perilaku (behaviour) tina sumber daya manusia.
"Ieu téh teu mung dilakukeun para kepala desa, tapi ogè para perangkat desa, RW sareng RT. Ieu salah sahiji rekomendasi nu kedah ku urang pidamel dina mayunan Indonesia Emas 2045: ngaronjatkeun SDM nu profesional sareng ngartos kana IT," ceuk Dadang Supriatna.
Kagiatan pesantren kilat, ceuk Dadang Supriatna, bakal maneuh dilaksanakakeun saban taun. "Kumargi perkawis kaimanan sareng katakwaan teh penting. Urang langkung mayunkeun kaimanan kumargi salasahiji pondasi nu utami dina raraga mèmèrès sistem sareng ngaladenan ka masarakat," pokna.
Bupati Bandung nyebutkeun pesantren kilat diiluan ku 96 kepala desa lurah ti dapil 2, 3 jeung 4 di Kabupaten Bandung.