Network
GALURA.CO.ID -Bupati Ciamis, Herdiat Sunarya, tanggal 11 Oktober 2023 ngaluarkeun surat edaran (SE) nomer 400.8.2.3 /1.480- Kesra ngeunaan Himbauan Shalat Istisqo Taun 1455 H/2023 M. Dina eta SE, Bupati Ciamis nyebutkeun solat istisqo dilaksanakeun poe Rebo, tanggal 18 Oktober 2023.
Eta SE ditujukan keur kepala OPD di auban pamarentah Kabupaten Ciamis, Kementrian Agama/Instansi Vertikal, BUMN/BUMD Kabupaten Ciamis, Cabang Dinas Pendidikan Wilayah XIII Jawa Barat, camat, kepala desa, kepala kelurahan jeung masarakat Kabupaten Ciamis.
Cumelukna Bupati Ciamis sangkan sakumana masarakat Kabupaten Ciamis ngalaksanakeun sholat Istisqo, solat keur menta hujan, pedah halodo taun ayeuna kagolongkeun katiga banget (halodo panjang), tambah deui cuaca panas.
Baca Juga: Menteri Agraria Masrahkeun 405 Sertifikat Ex Maloya, Bupati Ciamis: Patani Raharja Ngawujud
Katiga banget tur kawuwuh alam jeung lingkunganana loba nu ruksak, wewengkon Kabupatean Ciamis tigerat ku cai jeung loba daerah nu kakurangan cai beresih. Pamarentah Kabupaten Ciamis pikeun ngungkulan hal eta sawatara waktu ka tukang ngagelar rapat Koordinasi Pemerintah Daerah jeung MUI katut organisasi kaagamaan.
Hasil tina rapat koordinasi bieu, Bupati Ciamis cumeluk:
- Masarakat muslim Kabupaten Ciamis ngalaksanakeun solat istisqo jeung ngadu’a.
- Solat istisqo tingkat Kabupaten Ciamis dilaksanakeun poe Rebo, tanggal 18 Oktober 2023, jam 08:00 WIB, tempatna di Alun-Alun Galuh, pamilonna masarakat, kepala jeung karyawan OPD, instansi vertikal, BUMN, BUMD, barudak sakola, madrasah, jeung pasantrean.
- Dina waktu nu sarua, 18 Oktober 2023 jam 08:00 WIB solat istisqo dilaksanakeun ku unggal kecamatan kalurahan, jeung desa, anu miluanana pagawe kacamatan, pagawe kaluaran atawa desa, DKM, pasantren, jeung barudak sakola.
- Camat diperedih koordinasi jeung para kepala desa, kepala kelurahan sangkan ngalaksanakeun solat istisqo di wilayahna sewang-sewangan.
- Luyu jeung syariat, samemeh solat istisqo dipiharep puasa ti mimiti poe Ahad tepi ka poe Rebo (15-18 Oktober 2023) sarta mindeng ngadu’a jeung istigfar.
- Panduan tehnis solat istisqo disiapkeun ku MUI Kabupaten Ciamis jeung teks pidato disiapkeun ku Kemetrian Agama Kabupaten Ciamis.***
