Network
GALURA - Gubernur Jawa Barat, Ridwan Kamil, nyebutkeun, salila dirina ngajabat, warga miskin di daerahna aya dina angka penurunan alias ngurangan.
"Di Jabar, henteu aya panambahan warga miskin, nu aya malah penurunan," ceuk Ridwan Kamil, nalika ngaluuhan kagiatan Ujian Kompetensi Wartawan (UKW) anu diayakeun ku Pengurus Persatuan Wartawan Indonesia (PWI) Jabar, di Ballroom Hotel Aston Cirebon, Rebo (19/7/2023).
Numutkeun Ridwan Kamil, naon baé masalah pamaréntahan anu disanghareupan, dirina teu weléh ngalakukeun survey. Sual krisis ekonomi contona, dilakukeun survey, tuluy diterapkeun programna pikeun ngayonan masalah kamiskinan. Hasilna, dina dua taun, warga miskin téh angkana ngurangan 310 rébu urang.
Baca Juga: IKWI Jabar Nyangking Juara III Lomba Tumpeng Milangkala Ka-62 IKWI
"Jadi, gubernur nu saterasna, nya kedah langkung kenceng. Sim kuring ngadamel one pasantren one produk, desa digital, petani milenial, kridit tanpa agunan ka usaha mikro, ogé sareng Bu Atalia ngadamel sekoper cinta," pokna.
Ridwan Kamil gé nyebutkeun, ekonomi pangluhurna di Pulo Jawa nyaéta Jabar, investasi pangréana sa-Indonesia aya di Jabar salila lima taun noron. Malah, cenah, jalan tol pangréana di Indonesia aya di Jabar. "Jabar ogé surplus béas dugi ka 1,3 juta ton. Danget ieu aya 60 rébu hektar areal panén anyar," pokna deui.
Baca Juga: Kuliner Cirebon Sega Jamblang Asalna ti Jamblang, Sidekah ti Pangusaha Mulim keur Tukang Bangunan
Penghargaan Darma Saharsa Utama keur Gubernur
Naon anu diungkabkeun ku Ridwan Kamil sual keberhasilan Jabar téh, diungkabkeun dina kagiatan roadshow UKW angkatan 64 – 65 nu diayakeun ku Pangurus PWI Jabar salila dua poé, Rebo-Kemis (19-20/7/2023), di Ballroom Hotel Aston Cirebon. Éta UKW téh diiluan ku leuwih ti 60 wartawan sa-Wilayah III Cirebon.
Dina kagiatan anu langsung dibuka ku Gubernur Jabar, Ridwan Kamil, téh Pangurus PWI Jabar ogé sakalian méré penghargaan ka ieu Gubernur anu loma disebut Kang Emil. Éta penghargaan téh nyaéta Penghargaan Darma Saharsa Utama, minangka inisiator program 1.000 UKW di Jabar.
Sajeroning kitu, Ketua PWI Jabar, Hilman Hidayat ngaaprésiasi kana program 1.000 peserta UKW sa-Jabar. Numutkeun Hilman, ayeuna roadshow program 1.000 peserta UKW téh justru ditarurutan ku daérah séjénna. Éta téh, cenah, tangtuna henteu lésot tina peran penting jeung bantuan Gubernur Ridwan Kamil anu salila ieu raket naker jeung kalangan média.
Baca Juga: Head Line Galura Cetak Edisi III Juli 2023, Ritual 1 Suro di Tatar Sunda
"Pa Gubernur tos némbongkeun hal anu esensial. Anjeunna miduli pisan kana kualitas wartawan. Ahirna provinsi Jabar kersa ngabantos ieu program, sarta wartawan anu badé ngiring UKW henteu dipulut waragad alias haratis," ceuk Hilman.
Hilman teu ngabibisani, teu kurang ti 2 rébu pausahaan media sumebar di Jabar, sedengkeun jumlah wartawanna ngahontal 10 rébuan. Tina jumlah sakitu téh, ngan saeutik anu bisa lulus UKW jeung kaverifikasi Dewan Pers. Nya lebah dieu, ceuk Hilman, PWI boga kaleuwih dina ngurus kode etik jeung karaharjaan wartawan.
"Cohagna, Pa Gubernur téh kalintang ngabantosna ka para wartawan dina ngéngingkeun sertifikat UKW. Kitu deui, anjeunna gé kawilang sukses dina kapadulianana ngirangan angka kamiskinan di Jawa Barat," ceuk Hilman Hidayat.***
