GALURA - Keluarga Ibu-Ibu Senam Sehat (KISS) Kabupaten Bandung milu aub ngareuah-reuah acara Hari Pers Nasional (HPN) taun 2023 di Kabupaten Bandung.
Najan sapoèan girimis teu raat-raat, KISS tetep sumanget ngalakukeun Senam BEDAS di wana wisata Carita Alam, Pangalengan, Ahad, (11/2/2023).
Kepala Desa Margamukti H. Odang ngarojong ieu kagiatan, sok komo ieu kagiatan téh digelar di désa nu dipingpinna. Inyana ngawilujengkeun HPN ka-28 tur milangkala ka-77 PWI jeung ka para peserta senam KISS minangka pelaksana Senam BEDAS nu milangkala ka-4.
Pangurus PWI Kabupaten Bandung Apih Igun nganuhunkeun ka sakumna nu ngarojong ieu acara.
"Hatur nuhun ka pangurus PWI Kabupaten Bandung, owner Keday Baraya Bunda, Margahayu, Pa Cecep sareng Bunda Ida, Pa H. Odang, Kades Margamukti, Direksi Bank BPR Kerta Raharja, pinca KPO sareng Pangalengan. Teu hilap ka Setda ngalangkungan Kabag Umum Pemkab Bandung sareng komunitas Senam KISS, dugi ka ieu acara lumangsung sukses," ceuk Igun.***