GALURA -Kepala Biro Perekonomian Setda Jabar Yuke Mauliani Septina netelakeun Pemdaprov Jawa Barat kukuh dina nangtayungan jeung ngaping pamilon program Petani Milenial tepi ka sukses.
“Pemdaprov Jawa Barat teu weleh ngaping pamilon program Petani Milenial: ngalatih keur ngaronjatkeun kaparigelan dina tatanen, nyadiakeun bantuan sarana produksi tatanen,” ceuk Yuke.
Lian ti eta oge Pemdaprov Jawa Barat mantuan pamilon program Petani Milenial dina ngolah hasil panen, di antarana ngemas hasil tatanen supaya leuwih mibanda daya tarik keur konsumen.
“Pemdaprov Jawa Barat oge masrahkeun sertifikasi halal jeung ngabantuan ngurus Hak Kekayaan Intelektual keur produk nu dijual, malah ngabantuan masarkeunana,” ceuk Yuke.
Patalina jeung modal, Pemdaprov Jabar nyadiakeun fasilitas Kredit Usaha Rakyat (KUR) bank bjb.
Patani Milenial teu kudu nyadiakeun jaminan. Lebah dieu offtaker nu narima komoditas tatanen jadi avalist atawa nu jaminan ka bank bjb.
Yuke, pamilon program Petani Milenial di sakuliah Jawa Barat geus loba nu ngarasakeun hasil kauntunganana.
"Program Petani Milenial potensial pisan lantaran lahan di Jabar lega jeung SDMna rea,” ceuk Yuke.
Najan kitu, ceuk Yuke, dina prak-prakana kacandet ku pasualan eksternal nu memehna teu diduga. ”Contona perang Rusia - Ukraina," ceuk Yuke waktu jumpa pers di Gedung Sate Bandung, Kemis (02/02/2023).
Komoditas tanaman hias di Kecamatan Lembang, Kabupaten Bandung Barat, offtakerna hese ngekspor ka mancanagara antukna benefit ka patani tacan lancar.
Pemdaprov Jabar satekah polah ngabantu patani tanaman hias ku cara ngajual tanaman hias dina pameran, sarta cumelak ASN meuli tanaman hias.
Ceuk Yuke, Pemdaprov Jawa Barat terus-terusan ngaevaluasi jeung ngimetan program Petani Milenial, babakuna mun aya pasualan supaya engkena program Petani Milenial leuwih hade.***