Network
GALURA.CO.ID -“Bebegig Sukamantri milik Desa Sukamantri. Mun aya bebegig Sukamantri di daerah lian, eta mah aya jurig nyiliwuri. Atuh mun aya nu mere ngaran nu sejen padahal wandana sarua, mangkade sing iatna,” ceuk Bayu, tokoh nonoman nu oge Sekretaris Desa (Sekdes) Sukamantri, Kecamatan Sukamantri, Kabupaten Ciamis, Jawa Barat.
Bayu nyebutkeun Bebegig Sukamantri nu diropea ku seniman Sukamantri jadi seni helaran nu matak mincut, mibanda akar budaya jeung akar sejarah nu kuat. Dimedalkeun di wewengkon nu tadina kawah gunung api nu bitu taun 450 Samemeh Masehi (SM, Sebelum Masehi).
Bebegig Sukamantri oge gambaran pasukan elit Karajaan Karanggantungan nu kungsi ngadeg di wewengkon Desa Sukamantri. Pasukan Karanggantungan mun keur mancen tugas, ngajaga kaamanan, sok make topeng nu dijieun tina kulit kai.
Baca Juga: Bebegig Sukamantri Seni Helaran Has Ciamis Jadi Kesenian Has Malausma Kabupaten Majalengka?
Nu matak Bayu neueulkeun Bebegig Sukamantri estu milik Desa Sukamantri, milik Kabupaten Ciamis, milik Tatar Galuh, komo deui taun 2018, geus diaku jadi Warisan Budaya tak Benda (WBtB) Nasional. Ngandung harti Bebegig Sukamantri geus mibanda legalitas nu kuat, teu beda jeung WBtB sejenna.
Dipake kirab budaya
Kumaha mimitina Bebegig Sukamantri make aya dina kirab budaya Kabupaten Majalengka, saolah-olah eta teh kesenian has Kecamatan Malausma? Dina kirab budaya Majalengka unggal kacamatan diperedih kamonesan has kacamatan sewang-sewangan.
“Kantos aya nu dongkap ka dieu, sarta nyarios hayang mintonkeun Bebegig Sukamantri,” ceuk Cucu ti Sanggar Bebegig Baladewa Sukamantri. Eta tamu teh nanyakeun harga mun hayang magelarkeun Bebegig Sukamantri
Sanggar Bebegig Baladewa mindeng dipenta magelarkeun Bebegoig Sukamantri di daerah sejen, kalayan waragadan gumantung kana jumlah bebegigna jeung gumantung kana anggangna tempat pintonan.
Baca Juga: Longser ‘Benclang-Benclung’ Bandoengmooi, Kritikan keur Calon Pamingpin
Meureun ku sabab teu sanggupeun nebak waragadna, tamu bieu henteu datang deui ka Sanggar Bebegig Baladewa. ”Mung ngadangu aranjeunna nyewa topengna wungkul,” ceuk Rangga Aryanto, sarua ti Sanggar Bebegig Baladewa.
Beh dieu saheng, babakuna sanggeus aya dina youtube, aya nu nyeples Bebegig Sukamantri dina helaran budaya di Kabupaten Majalengka, bari ngaranna Buta Arega.
Puguh wae urang Sukamantri, jeung babakuna sanggar bebegig nu aya di Desa Sukamantri ngagurubug, sok sanajan dina Buta Arega waregu diganti ku daun kadaka. Kawasna pedah neangan daun waregu.
Sabada rame, ceuk Cucu sarta dienyakeun ku Rangga, nu kungsi nanyakeun harga pintonan Bebegig Sukamantri, datang deui ka Sanggar Bebegig Baladewa.
Arinyana sundak-sanduk menta dihampura pedah wani-wani mintonkeun helaran nu meh sarua jeung bebegig Sukamantri. “Aranjeunna teu terangeun soal Bebegig Sukamantri,” ceuk Rangga.
Boh Bayu, Cucu, boh Rangga nyebutkeun Bebegig Sukamantri memang dijadikeun sumber inspirasi ku para seniman Ciamis dina nyiptakeun seni helaran sejenna.
Upamana wae lahir Buta Kararas, Wayang Landung, Mabokuy, jeung Wayang Geugeus. Tapi wanda jeung asesorisna beda jeung Bebegig Sukamantri, henteu neplak Bebegig Sukamantri.
Ku kajadian Bebegig Sukamantri ganti ngaran jadi Buta Arega dina kirab budaya Kabupaten Majalengka, seniman Bebegig Sukamantri miharep siliajenan karya. Henteu niron hiji kesenian bari sagala rupana nyeples jeung kesenian nu geus lila aya jeung geus kakoncara kitu.
Maman Isak Juharman, perupa ti Sanggar Rakyat Buniseuri, Kecamatan Cipaku, Kabupaten Ciamis, neueulkeun pentingna Dinas Kebudayaan Pemuda dan Olahraga (Disbudpora) jeung Dinas Pariwisata Kabupaten Ciamis merhatikeun potensi budaya di Kabupaten Ciamis.
“Salila ieu, seniman Bebegig Sukamantri mun rek pentas jeung rek agustusan heseeun neangan daun waregu lantaran geus langka. Matak naon atuh Disbudpora jeung Dinas Pariwisata nyieun leuweung waregu?” ceuk Maman Isak.
Diaku ku Rangga jeung Cucu, seniman Bebegig Sukamantri, unggal rek ngagelar pintonan kudu ka ditu ka dieu, kudu ka luar Kabupaten Ciamis, neangan daun waregu. Kituna teh di Sukamantri, di Panjalu geus arang tangkal waregu.***
***
