Network
GALURA.CO.ID. - Forum Film Bandung (FFB), di Teater Tertutup Taman Budaya Jawa Barat, Jl. Bukit Dago Selatan, Kota Bandung, Jumaah (27/10/2023) ka peutingnakeun ngayakeun deui hajat gedé Festival Film Bandung. Sajumlah karya film, diimeutan ku Regu Pengamat Film ti FFB. Ti mimiti film sagemblengna, carita (skenario), akting pamaén, sutradara, tata musik, jeung sajabana, taya nu leupas, kabéh dititénan.
Nurutkeun Ketua Regu Pengamat Film, Rosyid E. Abby, ti 1 Séptémber 2022 tepi ka 31 Agustus 2023, aya 128 judul film anu dititénan, ngawengku 101 film bioskop jeung 27 film OTT (Over the Top) atawa streaming.
“Tayangan OTT masih jadi bagian panitén FFB. Sababna, OTT salila ieu geus jadi média film, média kréativitas para sinéas, lian film nu diputer di bioskop, tangtu waé kudu diaprésiasi,” ceuk Rosyid.
Nyambungkeun kateranganna, Rosyid nyebutkeun, judul film nu dititénan dina taun 2023 jumlahna ngaronjat dibandingkeun jeung jumlah produksi film mangsa mahabuna sasalad Covid19. Taun 2020-2021 produksi film ukur ngahontal 90 judul (25 film bioskop, 65 film OTT) katut 121 judul film dina taun 2021-2022 (72 film bioskop jeung 49 film OTT).
Baca Juga: Film jeung Narafilm Terpuji Festival Film Bandung Ka-36 Taun 2023
Dimaphum, mangsa mahabuna Covid19, mun jumlah produksi film kasebutkeun nyirorot téh. Da puguh sasalad pandemi ngateugkeun sakumna kahirupan jeung karya kréatif manusa. Sanajan kitu, urang boga kawajiban nembrakkeun aprésiasi ka sakumna sinéas, nu tetep bisa nyieun produksi film nu médiana ngagunakeun média virtual atawa streaming.
Atuh, ku lantaran pandemi téa, acara FFB salila dua taun dilaksanakeun sacara virtual. Alhamdulillah, dua taun kaayeunakeun, ti mimiti 2022, Festival Film Bandung bisa dilaksanakeun deui di panggung, lain virtual deui.
Tina 128 judul film nu dititénan ku para pengamat FFB, paniténna dibagi kana opat periode, saban periode kabagi (rata-rata) 20 judul film. Tina 20 film éta, dicokot nomine nu baris narima pangajén “Terpuji”. Genre film nu dititénan, nurutkeun Rosyid, caritana rageman, aya drama asmara jeung carita kulawarga, komédi, aya carita laga, jeung nu paling dominan, carita horor nu di jerona nyaritakeun adumanis carita budaya lokal nu dicampuran ku mitos jeung mistik.
Ku lantaran film Indonesia kudu boga idéntitas, ngagambarkeun kultur budaya Indonesia, wajar mun carita film nu ngahudang sumanget kaindonesiaan, meunang pangajén paling pinuji nu tujuanna sangkan jati diri budaya bangsa, salawasna kajaga. Éta pisan tujuanna jejer Festival Film Bandung taun ieu: “Film Indonesia Jati Diri Bangsa”.
