Network
GALURA -Wewengkon nu ayeuna dingaranan Desa Kersamanah, Kecamatan Kersamanah, Kabupaten Garut, pernahna di jalur patalimarga Bandung - Tasikmalaya via Malangbong dijadikeun lembur dumasar manuk titiran nu dihiberkeun ku Eyang Sacarudin.
Eyang Sacarudin teh, ceuk Abah Oneng nu dumuk di Kampung Calingcing, Desa Kersamanah, pituin urang Demak, apruk-aprukan ti Demak tepi ka anjog ka Kadusunan Ciarog nu ayeuna kabawah ka Desa Kersamanah.
Apruk-aprukanana Eyang Sacarudin teh ku lantaran nutur-nutur hiberna manuk titiran. Di mana bae manuk titiran eunteup, di dinya Eyang Sacarudin eureun lumampahna sarta terus dumuk di dinya.
Baca Juga: Mama Cikendal Ngalawan kolonial jeung Meruhkeun Gorombolan (2, Rengse)
Baca Juga: Tajug Cikendal di Cioray Tengah, Kecamatan Kersamanah Kabupaten Garut, Ngandung Ajen Sejarah (1)
Eta manuk titiran teh kameumeutna Eyang Sacarudin. Ceuk carita Abah Oneng, basa keur dumuk keneh di Demak, Patih Demak, ngeukeuhan ka Eyang Sacarudin, sangkan manuk titiran teh dibikeun ka dirina.
Ku lantaran teu dibikeun, nya Patih Demak teh ambek, tuluy ngusir Eyang Sacarudin, sangkan kaluar ti wewengkon kapatihan. Harita, memeh lumampah, Sacarudin, ngagerendeng nyarita ka manuk titiran, jig hiber kamana bae, ku kula dituturkeun.
Manuk teh hiber, dituturkeun ku Sacaruddin. Tepi ka hiji mangsa, eta manuk eunteup dina tangkal caringin gede di wewengkon Pawenang, teu jauh ti lembur Tarikolot. Dina tangkal caringin, manuk titiran teh eunteup, tuluy disada.
Handapeun tangkal caringin, Sacarudin nungguan sawatara poena. Ti dinya, manuk titiran geleber deui hiber tepika anjogna di Kampung Ciarog ayeuna.
Dina luhur tangkel asem, titiran teh eunteup, disada. Eyang Sacarudin, nungguan deui dihandapeun tangkal asem. Ngan, heranna, eta titiran teh teu hiber deui.
