PLTA Cinangling Kabupaten Subang, Titinggal Jaman Kolonial Belanda, Saksi Kajayaan P & T Lands

GALURA -Pembangkit Listrik Tenaga Air Cinangling (PLTA Cinangling), nu pernahna di Kampung Cinangling, Desa Cisampih, Kecamatan Dawuan, Kabupaten Subang, teh, titinggal jaman Kolonial Belanda. Lian ti eta saksi kajayaan pausahaan perkebunan milik Tuan Hofland, Pamanoekan and Tjiasem Lands (P & T Lands).

PLTA Cinangling lain diadegkeun ku pamarentah Kolonial Belanda, tapi ku swasta, ku P and T Lands, taun 1927, keur nyaangan wilayah pakebonan cangkingan P&T Lands: Pasirbungur, Ciasem, Jalupang jeung Tambaksari nu ayeuna kabawah ka Kabupaten Subang.

Lian ti ngadegkeun PLTA Cinangling, keur ngalistrikan pakebonan sejenna, P and T Lands ngabangun PLT Gunung Tua jeung PLTA Cijambe, duaana oge kabawah ka Kabupaten Subang. PLTA Cinangling, PLTA nu panggedena dibandingkeun PLTA Gunung Tua jeung PLTA Cijambe.

Baca Juga: Legislator PKB KH Maman Imanulhaq Wera, RSUD Ciereng Subang Nolak Pasen Rek Ngalahirkeun dina Kaayaan Kritis

PLTA Cinangling ngamangpaatkeun Walungan Ciasem nu dibendung di saluran irigasi Curug Agung, tonggoheun wangunan PLTA. Ieu bendungan memang lain ukur keur PLTA tapi oge keur nyaian lahan tatanen, babakuna sawah.

Kiwari, PLTA Cinangling nu kungsi nyaangan sabagian wilayah wewengkon Kabupaten Subang téh saukur nyésakeun tapak-tapak kajayaan nu rongkah di jaman onderneming Landens kumawasa.

Wangunan mah masih weweg ngajegir sanajan geus ampir saratus taun umurna, diitung tepi ka taun 2020.

Turbin urut operasi PLTA Cinangling masih lengkep tur sarwa weweg, ngajungkiring di sisi jalan Desa Cisampih. Ngan, haramunan, simpé, jeung kurang dirumat.

Baca Juga: Danrem 063 Sunan Gunung Jati Masrahkeun Bantuan keur Korban Banjir di Subang

Padahal wangunan PLTA Cinangling teh salahsahiji wangunan nu nyatetkeun hiji peradaban nu pinuh ku ajen histori kajayaan Subang di mangsa baheula.

Masarakat ngusulkeun PLTA Cinangling dijadikeun destinasi wisata sejarah lokal, dieuyeuban ka pasilitas sejenna sangkan mincut wisatawan, boh wisatawan lokal boh wisatawan mancanagara.

Babakuna pikeun mncut wisatawan ti nagri Belanda jeung ti Inggris nu hayang napak tilas tapak lacak luluhurna di Kabupaten Subang.

Mun tea mah geus jadi destinasi wisatasalian ti ngadatangkeun materi, bangun jeung sagala rupana oge bakal karumat. Dipiharep pamarentah Kabupaten Subang mateakeun wangunan titinggal jaman jaya-jayana P&T Lands.

PLTA Cinangling memang salahsahiji aset anu bisa dijadikeun destinasi wisata sejarah keur kahareupna. Anu tangtuna bakal gede mangpaatna nu paling karasa mah nyata ku masyarakat.***