Network
GALURA.CO.ID -Objek wisata Guha Jatijajar di Kebumen loba didareugdeug ku turis ti Jawa Barat. Eta teh pedah aya pangbibita riwayat lalampahan seuweuna Prabu Siliwangi anu ngumbara tepi ka jadi rajana pisan.
Turis ti wewengkon Jawa Barat loba nu aleut-aleutan muru ka sawatara objek wisata nu aya di Jawa Tengah, sabab hayang ngalanglang wisata budaya jeung sajarah anu aya di eta wewengkon. Salasahijina: objek wisata Guha Jatijajar, di Kebumen, Kabupaten Purwokerto.
Eta geus dipilampah ti taun 1970-an keneh, sanajan harita masih keneh jadi objek wisata sasaran antara, istilahna teh. Turis ti Jawa Barat harita masih keneh tetep mentingkeun Yogyakarata nu sasaran utama atawa daerah tujuan utama wisata.
Contona kieu: tujuan utamana mah muru Candi Borobudur, Candi Mendut jeung Prambanan, atawa ka Parangtritis. Ngan naha inditna atawa naha balikna, pasti nyimpang ka Guha Jatijajar. Guha Jatijajar jadi perhatian husus pikeun urang Jawa Barat sabab aya patalina jeung sajarah Pajajaran.
Kieu cenah caritana teh. Baheula dina abad ka-16 aya sinatria Pajajaran anu katelahna Banyak Citra. Ku urang Jawa Tengah mah robah jadi Banyak Cotro. Banyak Citra teh, seuweuna Sri Baduga Maharaja Prabu Siliwangi (1482-1521) ti selir.
Banyak Citra rek dibenum jadi raja bawahan ngan saratna kudu boga pipermesurieun heula. Ku sabab kitu, Banyak Citra dititah ngumbara jang neangan pipamajikaneun. Cenah ceuk carita teh, Banyak Citra ngalalana ka tatar wetan. Nya anjog ka wilayah Karajaan Pasirluhur nu ayana di wewengkon Banyumas.
Ngan bae Banyak Citra datangna ka Pasirluhur teh teu ngaku anak raja. Teu ngaku ngaran Banyak Citra. Nelahkeun maneh mah Kamandaka. Pakean oge diganti jadi jenis pakean keur somah. Ngan ku sabab paripolahna hade jaba kasep, di Karajaan Pasirluhur diaku anak ku Patih Reksanata.
Ari anu jadi raja harita katelahna Adipati Kanandaha. Pasirluhur teh harita mah bawahan Pajajaran. Sabab kakawasaan Pajajaran harita tepi ka Banyumas.
Adipati Kanandaha boga sababaraha urang anak awewe. Lolobana geus rimbitan kajaba Dewi Ciptarasa. Banyak Citra kataji ku ieu putri. Saking bogohna, Banyak Citra nyulundup ka kaputren tapi samemeh nepungan sang putri kaburu kaperego ku perjurit.
