Network
GALURA.CO.ID -Diitung tina lahirna tari jaipong karya Gugum Gumbira Tirasondjaya taun 1980 tepi taun 2024 ayeuna geus leuwih ti 40 taun. Tapi tacan aya deui ibing Sunda nu ngagenjleungkeun, kawas jaipong. Ari aya mah aya ngan can dipikawanoh.
Taun 1950-an medal ibing gubahan, ibing wanda anyar, atawa ibing kréasi anyar. Dibaladahan ku Tjétjé Somantri, salahsaurang muridna Sambas Wirakusumah, seniman tari anu dipercaya ku pamaréntah mangsa harita ngokolakeun Badan Kesenian Indonésia (BKI), nu kantorna di Yayasan Pusat Kebudayaan (YPK), Jalan Naripan Bandung.
Karya tarina karéréana ibingan putri, ibingan keur kaom wanoja. Sababaraha karya tarina: Ibing Srigati, Sekar Putri, Ibing Déwi, Sulintang, Kandagan, jeung Topéng Koncaran. Sumber garap ibinganna, tina ibing Keurseus, Ibing Topéng Cirebon, Ibing Wayang, jeung Ibing gaya Jawa.
Baca Juga: Pepadi Ciamis Gede Harepan Seni Wayang di Ciamis Mingkin Nanjung
Ti harita muncunghul koréografer ibing Sunda. Di antarana R. Nugraha Sudireja, karya ibingna: Rengganis, Narantika, Ibing Puragabaya, jeung ibing topéng tilu watek; Iyus Rusliana, karya ibingna dina wanda ibing wayang, muridna di antarana Irawati Durban, Yuyun Kusumadinata, jeung Indrawati Lukman.
Ibing Jaipongan
Taun 1980-an, tatar Sunda geunjeung ku jaipongan, karya Gugum Gumbira Tirasonjaya. Ibingan tina ibing somah, ibing rayat, ibing tayub anu saka (sakainget), ngajangélék jadi ibingan anu mibanda pola. Dina ibinganna aya struktur (leunjeuran). Saméméhna, upamana ketuk tilu, bajidoran, dogér jeung ibing rayat séjénna teu aya pola anu baku.
“Mangsa bihari, dina panggung ibing rayat teu kacaturkeun aya pola anu maneuh, atawa anu baku, anu ngibingna saka, nurutkeun keretegna haténa, nurutkeun geter rasana. Unggal réngkakna nincak kana wirahma,” ceuk Bucky Wikagoe, seniman nu ayeuna jadi anggta DPRD Jawa Barat.
Lebah dieu tukang kendang kudu telik sabab mun réngkak nu ngibing teu kaeusian alamat bakal moal meunang jaban atawa pamasak, atawa panambal, malah aya kalana baris dicarékan ku anu ngibing. “Dina ketuk tilu ditegor ku pamogoran, dina panggung jaipongan ku bajidor,” ceuk Bukcy Wikagoe.
Baca Juga: Dunya Usaha di Urang Kalindih ku Produk Luar Kitu Ceuk Longser Bandung Mooi
