Network
GALURA.CO.ID. - Penjajahan Israel di Palestina mingkin pihariwangeun. Panungtung, kamp pangungsian di Jabalia, tempat urang Palestina, dua poe noron diserang, Salasa 31 Oktober 2023 tepi ka Rebo 1 Nopember 2023.
Akon-akonna, cenah aya komandan Hamas di dinya. Targetna ngan saurang tapi nu tiwas ampir 200 urang, sarta ampir 800 urang tatu parna.
Tepi ka Jumaah 3 Nopember 2023, warga Palestina anu maot syahid téh geus ngahontal 9.061 urang. Tina jumlah sakitu, 40 persén anu tiwas téh barudak, nyaéta 3.195 urang.
Nurutkeun organisasi Save The Children, réana korban ngaleuwihan jumlah barudak nu tiwas di zona konflik dunya unggal taunna, ti 2019. Réana korban nu tiwas téh ngan dina waktu tilu minggu, saprak perang Israel-Hamas bitu. Jumlahna bisa baé nambahan sabab aya leuwih ti 1.000 barudak dilaporkeun leungit di Gaza.
Gencatan senjata tong diengké-engké deui
Jumlah barudak nu tiwas di Gaza korban kabiadaban Israel téh leuwih réa batan jumlah korban barudak nu tiwas balukar perang di 20 nagara, dina 3 taun ka ahirnakeun. Dumasar tilu laporan taunan pandeuri ti Sekretaris Jenderal PBB ngeunaan “Anak-anak dan Konflik Bersenjata”, aya 2.985 barudak tiwas di 24 nagara dina 2022.
Dina 2021, jumlah barudak anu tiwas téh 2.515. Taun 2020, aya 2.674 barudak tiwas dina konflik bersenjata di 22 nagara. Sedengkeun dina 2019, aya 4.019 barudak anu tiwas.
Direktur Save The Children, Jason Lee nandeskeun yén kekerasan salila tilu minggu geus misahkeun barudak ti kulawarga sarta gancang naker ngancurkeun kahirupan maranéhanana.
Gencatan senjata téh kudu. Teu bisa diengké-engké deui. Ku kituna, geus waktuna masarakat internasional leuwih ngutamakeun kapentingan masarakat batan pulitik. Eureunan debat nu taya hartina nalika barudak mingkin loba nu tariwas tur tatu parna.
