Network
REK saengab-engabeun nembal, karasa batu leutik keuna kana bitisna, henteu tarik. Bena rarat-reret. Breh teh Rait jeung Suba keur ngajarega deukeut parahu, teu jauh ti tempat diukna.
Waktu rek nangtung, di peuntaseun beulah ditu katempo ngaburudul sababaraha urang muru ka darmaga, sawareh tumpak kuda sarta sawareh deui laleumpang. Najan kaayaan geus rada poek, ku Bena kaciri kabeh oge make pakean prajurit.
“Perjurit Carbon deui kitu?” ceuk tukang parahu.
“Mindeng ngaliwat ka dieu?” ceuk Bena bari nyampeurkeun tukang parahu.
“Sababaraha poe ka tukang mah leuwih loba. Parahu nu keur ditambat di dieu oge sina ka ditu. Kula meunang opat balikan meuntaskeunana,” tembal tukang parahu.
“Mucekil atuh,” ceuk Bena bari seuri.
“Teu purun meuntaskeunana saenyana mah,” tembal tukang parahu.
“Naha?”
“Nyebutna mah rek kulon,” ceuk tukang parahu.
