Network
GALURA-Satreskrim Polres Kuningan ngamankeun 18 urang santri Pondok Pesantren (Ponpes) Husnul Khotimah, anu perenahna di Desa Maniskidul, Kecamatan Jalaksana, Kabupaten Kuningan. Ieu pasantren teh kawentar, santrina rereana ti luar daerah.
Anu jadi kasang tukang ngalantarankeun welasan santri ieu pasantren, nyaeta diduga geus ngalakonan tindak pidana ngoroyok atawa neunggeul salasaurang santri ponpes Husnul Khotimah sejenna nepika tiwasna.
Baca Juga: Polres Kuningan Nyangkalak Lima Palaku Narkoba
Kepala Kepolisian Resor (Kapolres) Kuningan, Ajun Komisaris Besar Polisi (AKBP) Willy Andrian, nyebutkeun tina sajumlah santri anu diamankeun 6 di antarana geus ditetepkeun miangka tersangka.
Ari 12 santri Ponpes Husnul Khotimah sejenna, kiwari aya pangawasan Unit Pelaksana Teknis Daerah Perlindungan Perempuan dan Anak (UPTD PPA) Dinas Pengendalian Penduduk dan Keluarga Berencana (DPPKB) Kabupaten Kuningan, lantaran umurna masih tacan dewasa.
Willy nyebutkeun, sababaraha santri diduga ngaraponan saurang santri anu urang Bekasi, kajadianna teh poe Kemis, 30 November 2023) kira wanci tabuh 11.00 WIB. Korban kungsi dibawa ke rumah sakit. Sanggeus heuleut sababaraha poe tilar dunya.
“Henteu diwenangkeun ngalakonan tindakan sosoranganan. Sok komo dugika ngabalukarkeun korban tilar dunya,” ceuk Willy, di Mapolres Kuningan, Rbu, 6 Desember 2023.***
