Network
GALURA-Satuan Reserse (Satres) Narkoba Polres Kuningan, salila bulan Oktober 2023, nyangkalak lima palaku tindak pidana anu aya patalina reujeung narkotika jeung obat terbatas (narkoba).
Lima palaku anu kacangkalak ku pulisi teh inisial Y (32 taun), R (25 taun), D (25 taun), G (23 taun), M (24 taun), urang wewengkon Kabupaten Kuningan. Maranehna katewak ku pulisi dina waktu reujeung tempat anu beda.
Kapolres Kuningan, Ajun Komisaris Besar Polisi (AKBP) Willy Andrian, nyebutkeun salila sabulan, pulisi sajaba nyangkalak palaku oge ngamankeun barang bukti rupa-rupa jenis narkoba.
Baca Juga: Polres Kuningan Nyalurkeun Bantuan, Pikeun Warga Anu Katibanan Musibat Alam
Ceuk Willy, hiji di antarana 50 paket narkotika diduga jenis sabu beuratna 40,04 gram, diduga milik tersangka inisial Y, anu kacangkalak jeung katohiyan neundeun narkoba di imah kolotna, lelewek Kecamatan Sindangagung.
Sajaba di imah kolotna, pulisi oge manggihan barang bukti narkoba anu diteundeun ku Y di sababaraha tempat. Di antarana di jalan wewengkon Kecamatan Sindangagung, Garawangi, Ciawigebang, Cipicung, Cigugur, Kramatmulya, Jalaksana jeung Kecamatan Kuningan.
“Dina ngayakeun transaksi ngajual atawa ngedarkeun narkotika, palaku sacara langsung atawa istilah COD (tatap muka),” ceuk Willy.***
