Network
GALURA - Polres Majalengka kekep pisan ngajaga kaamanan Presiden Joko Widodo waktu ngaroris Bandara Internasional Jawa Barat (BIJB) atawa Bandara Kertajati Majalengka, Salasa (11/07/2023).
Sakira jam 08:40 WIB Presiden Joko Widodo anjog ka BIJB Kertajati sarta langsung nitenan aktivitas di bandara jeung ngaroris fasilitasna. Pangamanan ti Polres Majalengka lumangsung lungsur-langsar. Taya gangguan nanaon.
Presiden Joko Widodo di BIJB Kertajati dibarengan ku Sekretaris Kabinet Pramono Anung, Menteri BUMN Erik Thohir, Menteri Perhubungan Budi Karya Sumadi, Gubernur Jabar, Direktur Utama Angkasa Pura II Muhammad Awaludin, jeung Kapolda Jabar Irjen. Pol. Akhmad Wiyagus sarta dijaga kaamanana ku Polres Majalengka.
Baca Juga: Presiden Joko Widodo Ngaapresiasi Ngaronjatna Aktivitas di Bandara Kertajati, Bakal Ngageser Husen
Rengse ngaroris BIJB Kertajati, Presiden Joko Widodo katut rengrengan nuluykeun lalampahana make mobil mapay Jalan Tol Cisumdawu dina raraga ngaresmikeun jalan Tol Cisumdawu tur kagiatan lianna.
Kapolres Majalengka AKBP Indra Novianto,S.I.K., nyebutkeun ti isuk keneh, anggota Polres Majalengka geus jaga di sabudeureun BIJB Kertajati katut jalur nu bakal diliwatan Presiden Joko Widodo.
Ratusan petugas kapulisian, dilengkepan ku peralatan pengamanan modern, diterukkeun pikeun ngajaga kaamanan jeung lancarna acara jeung kagiatan Presiden Joko Widodo.
AKBP Indra Novianto,S.I.K., netelakeun pihakna jauh samemehna geus tatan-tatan ngajaga kaamanan Presiden Joko Widodo di Majalengka. “Polres Majalengka koordinasi sareng instansi sanesna," pokna. Satuan TNI, Dinas Intelijen, Satuan Polisi Pamong Praja Kabupaten Majalengka oge aub.
