Network
GALURA -Presiden Joko Widodo ngaapresiasi ngaronjatna aktivitas penerbangan di Bandara Kertajati atawa Bandara Internasional Provinsi Jawa Barat (BIJB Kertajati), nu lumangsung kalayan hade. Eta apresiasi ditepikeun Presiden Joko Widodo rengse ngaroris fasilitas bandara pangbadagna kadua di Indonesia, Salasa, (11/07/2023).
"Simkuring ngaraos reueus margi aktivitas di Bandara Kertajati tos kawilang hade. Kiwari tos digunakeun pikeun embarkasi haji. Kirang langkung 8 rebu jamaah haji ti tujuh kabupaten kota di Provinsi Jawa Barat nanggo ieu bandara," ceuk Presiden Joko Widodo dina kateranganna ka wartawan rengse ngaroris BIJB Kertajati.
Salian pikeun embarkasi haji, BIJB Kertajati, ceuk Presiden Joko Widodo, ngaladenan sajumlah panerbangan internasional. Di antarana penerbangan umroh opat kali saminggu sarta penerbangan rute Kuala Lumpur-Bandara Kertajati dua kali saminggu.
"Kapayunna diawitan sasih Oktober 2023 Bandara Kertajati bakal operasi sagemblengna, hartosna ti Bandara Husein Sastranegara bakal digeser ka Kertajati utamina kangge pesawat jet," ceuk Presiden Joko Widodo.
Dina eta kasempatan eta, Presiden Joko Widodo oge ngaapresiasi minat investor ti sababaraha nagara nu bakal investasi di BIJB Kertajati. Presiden nyebutkeun pamarentah bakal sagancangna nangtukeun tur ngalancarkeun proses investasi.
"Di sasih Oktober supados nu ngoperasikeun Bandara Kertajati tiasa ngiring di kapamilikan Bandara Kertajati. Dipiharep traffic-nya, lalu lintasna, langkung euyeub nalika aya investor luar nu aub di Bandara Kertajati," ceuk Presiden Joko Widodo.
Presiden Joko Widodo miharep sababaraha tarekah nu geus dilaksanakeun ku pamarentah pikeun ngaronjatkeun aktivitas penerbangan di Bandara Kertajati hasilna nyugemakeun. Pon kitu deui, Jalan Tol Cisumdawu nu bakal sagancangna diresmikeun bisa nyinggetkeun waktu tempuh antara Bandara Kertajati jeung Bandung.
