GALURA –Sekda manten Ciamis, Dr H Toto Marwoto, dina Pemilu 2024 ngandidat anggota legislatif DPRD Kabupaten Ciamis, ti Partai Nasdem. Dr H Toto Marwoto tandang makalangan ti Dapil 1: Kecamatan Ciamis, Kecamatan Cikoneng, Kecamatan Sindangkasih jeung Kecamatan Sadananya.
Samemeh ngagabung jeung Partai Nasdem H.Toto Marwoto aktif di Kosgoro. Sanggeus pangsiun aktif di Partai Golkar, jeung di Partai Gerinda. Ceuk H Toto nu dumuk di Desa Sukajadi, Kecamatan Sadananya, Kabupaten Ciamis teh, pindah partey biasa dina pulitik mah.
Di Partai Nasdem, H Toto Marwoto nu tepi ka pangsiun babakti di pamarentah Kabupaten Ciamis sarta mampu ngahontal karir pangluhurna dina tataran ASN, jadi Sekda, bisa nyaleg di lemburna sorangan.
Baca Juga: Haji Prawatasari (1) Cenah mah Rundayan Panjalu Ciamis
Baca Juga: Ritual di Kabupaten Ciamis Ngandung Simbul Ajaran Islam, Islam Gumulung dina Budaya Sunda
Baca Juga: Galura Cetak IV Juli 2023, Kampung Iklim Ciparay Kabupaten Ciamis, Nohagaan Iklim Lokal
Samemeh jadi Sekda, H Toto Marwoto kungsi jadi kepala Humas Pemda Ciamis, Kepala Disdik Kabupaten Ciamis, jeung sajabana. Sanggeus teu jadi Sekda ngajabat asisten bidang ekonomi pembangunan tepi ka pangsiun.
Di luar birokrat, H Toto Marwoto kungsi jadi Kepala Pelaksana Harian (Ka Lakhar) Badan Narkotika Kabupaten (BNK) Ciamis, 06 Februari 2009 tepi ka 15 Oktober 2010.
Salian ti eta jadi dosen di FISIP Unigal jeung di Pascasarjana Unigal, tepi ka danget ieu. Samemeh pangsiun mah H Toto Marwoto teh nya birokrat nya akademisi.
Sanggeus pangsiun, salian ti akademisi oge ancrub kana pulitik nu ayeuna ngagabung jeung Partai Nasdem, partey nu nyalonkeun Anies Baswedan jadi presiden dina Pemilu 2024.
Asak di birokrat jeung salawasna raket jeung masarakat, H Toto Marwoto mibanda bekel nu leuwih nu cukup keur jadi anggota legislatif Kabupaten Ciamis.
H Toto Marwoto leuwih ti apal naon nu kudu dipilampah keur leuwih ngamajukeun Kabupaten Ciamis jeung keur leuwih ngaraharajakeun masarakat Tatar Galuh.***