GALURA – Rapat dengar pendapat (RDP) Komisi I DPRD Kabupaten Majalengka jeung Kapolres, Kejari, KPUD Majalengka, Kesbangpol, katut wawakil masarakat nu tadina dilaksanakeun Rebo, 8 Marert 2023, teu jadi. Alatanana KPUD narah ngaluuhan.
Memehna Komisi I DPRD Majalengka, dina surat nomor TU.00.03/193/DPRD tanggal 3 Februari 2023 nu ditujukeun ka Forum Masyarakat Pemerhati Pemilu Majalengka ngogan KPUD Majalengka ngaluuhan RDP nu bakal dilaksanakeun Rebo (8/2/2023) jam 10 WIB.
Dina eta surat nu ditandatangan ku Wakil Ketua DPRD Kabupaten Majalengka, H. Asep Eka Mulyana, disebutkeun materi RDP mekanisme rekrutmen anggota PPS (Panitia Pemungutan Suara) di Kabupaten Majalengka.
Baca Juga: KPUD Majalengka Ngarekrut Tanaga Pendukung PPK, Naha Enya Transparan?
Pangna Komisi I DPRD manggil KPUD Majalengka lantaran rekrutmen anggota PPS nu dilaksanakeun ku KPUD Majalengka di Kabupaten Majalengka ricew sarta ngabalukarkeun polemik masyarakat.
Anggota Komisi I DPRD Majalengka, Dasim Radea Pamungkas nu tadina rek mingpin RDP nyebutkeun dina surat balesanana, KPUD Majalengka nganggap Komisi I DPRD Kabupaten Majalengka teu boga wewenang ngundang KPUD.
Dasim Rades, politisi nu partaina, Nasdem, geus nyalonkeun Anies Bawesdan dina pilpres 2024 nyebutkeun DPRD Kabupaten Majalengka dina ngajalankeun pancenna luyu jeung tatib.
“Salahsahiji mitra Komisi I teh KPUD,” ceuk Dasim Radea. Komisi I DPRD Kabupaten Majalengka kungsi ngondang BPN, sarta BPN hadir.
Baca Juga: Milangkala ka-50 KSPSI, Door Prize Motor 2 ti Bupati Majalengka
Ceuk Dasim Radea, Komisi I DPRD Majalengka rencanana rek konsultasi ka DPRD Jawa Barat ngeunaan ricewna rekrutmen PPS di Kabupaten Majalengka.
Sikep Dasim Radea beda pisan jeung Asep Eka Mulyana. “KPUD Majalengka dina proses rekrutmen anggota Panitia Pemilihan Kecamatan (PPK) jeung Panitia Pemungutan Suara (PPS) geus transparan,” pokna.
Ceuk Asep Eka Mulyana, KPUD Majalengka geus ngajentrekeun ngeunaan proses rekrutmen badan adhoc nyaeta anggota PPK jeung anggota PPS. Najan kitu, “Sumkuring masihan kamandang ka KPUD Majalengka sangkan ngajelaskeun ka publik perkawis rekrutmen badan adhoc PPK katut PPS,” pokna.
Asep Eka Mulyana nyarita kitu waktu ditepungan ku wartawan di Gedong DPRD Kabupaten Majalengka, Rebo (08/03/2023) sabada Komisi I DPRD Majalengka teu jadi ngagelar rapat RDP.
Baca Juga: Tb Hasanuddin Nganjang ka Padepokan Pencak Silat Lodaya Aki Panglipur Cabang Kabupaten Majalengka
“KPUD Majalengka menta dihampura dumeh henteu tiasa ngaluuhan RDP,” ceuk Asep Eka Mulyana. Ku DPRD Kabupaten Majalengka, teu hadirna KPUD Majalengka teu dianggap pelecehan ka badan legislatif.
Asep Eka Mulyana nyebutkeun pasualan rekrutmen PPK jeung PPS tepi ka KPUD Majalengka sina datang dina rapat RDP, geus dianggap beres sarta moal kapapanjangan, sanajan KPUD Majalengka teu hadir.
“Simkuring katut rengrengan nganggap (pasualan rekrutmen PPK jeung PPS) tos beres supados teu kapapanjangan,” ceuk Asep Eka Mulyana.*** Ayank R Sambara