GALURA -Dina Musda XV KNPI Kabupaten Majalengka nu lumangsung Saptu (18/02/2023) di Gedong Graha Pemuda Majalengka, Anto Febrianto, sekretaris GADA AMS kapeto jadi Ketua KNPI Kabupaten Majalengka periode 2023-2026.
Ketua pelaksana, H. Jejep Falahul Alam netelakeun, dina Musda XV KNPI Kabupaten Majalengka picaloneun aya tilu urang: Deri Dwi Permadi Putra ti Gerakan Mahasiswa Nasional Indonesia (GMNI), Anto Febrianto dirojong Generasi Muda Angkatan Muda Siliwangi (GADA AMS) jeung Alfatihah Ramadlan ti Satuan Pelajar-Mahasiswa (Sapma) Pemuda Pancasila.
"Organisasi Kepemudaan (OKP) nu aya dina auban KNPI, anu mibanda hak pilik jumlahna 67 OKP, ditambah 25 Pengurus Kecamatan (PK) KNPI,” ceuk H.Jejep. Dina Musda XV KNPI Kabupaten Majalengka Deri Dwi Permadi Putra, sekratris GADA ANS Anto Febrianto jeung Alfatihah Ramadhan marebutkeun 96 soara.
Pemilihan ketua, dilaksanakeun ti mimiti jam 10 peuting sarta rengse jam 12 peuting nyedek ka janari leutik. Dikawal ku aparat ti Polres Majalengka. Lumangsung kalayan aman jeung tartib.
Anto Febrianto ngantongan soara 50, Alfatihah Ramadlan nyangking soara 43 jeung Dery Dwi meunang soara 1. “Simkuring ngahaturnuhunkeun ka OKP katut PK KNPI nu tos masihan kapercayaan ka simkuring mupuhuan KNPI Kabupaten Majalengka,” ceuk Anto Febrianto.
Anto Febrianto nu sapopoena dosen di STAI PUI salian ti sekretari GADA AMS, nyebutkeun dina kapangurusanana ngutamakeun KNPI jadi mitra strategis pamarentah, ngawujudkeun KNPI wadah pemberdayaan pamuda nu inovatif.
"Nu utami ngadamel program kangge OKP nu aya dina auban KNPI, sareng pemberdayaan PK KNPI. Saterasna ngabuktoskeun KNPI jadi rohangan kamotekaran kapamingpinan nu dinamis,” ceuk Anto Febrianto.
Baca Juga: Denny Rianto Kapeto Minangka Ketua PELANGI Kabupaten Kuningan
Salian eta ngawujudkeun KNPI Majalengka jadi wadah kamotekaran kawirausahaan pamuda. KNPI bakal ngajeujeuhkeun parapamuda dina wirausaha.