GALURA - Direktur PT Persib Bandung Bermartabat (PT PBB), Teddy Tjahjono miharep kualitas wasit jeun asistenna nu mancen tugas mingpin Liga 1 2022/2023 kudu dironjatkeun deui.
Eta hal ditembrakkeun Teddy ngomentaran hasil pertandingan Persib vs PSM Makassar Salasa kamari nu hasilna nguciwakeun keur Maung Bandung.
Teddy nembrakkeun, Persib saenyana narima kana hasil laga Persib vs PSM Makassar kamari. Najan elehna Persib teh ngabalukarkeun Persib gagal naek ka puncak klasemen jeung rekor teu eleh dina 15 pertandingan, peuyar.
Baca Juga: Persib vs PSM Makassar, Nu Meunang Nerekel ka Puncak Klasemen, Link Live Streaming jeung Kick Off
Najan kitu, Persib tetep meredih ka PT Liga Indonesia Baru (LIB) jeung PSSI sagancangna ngundakkeun kualitas wasit jeung asisten wasit.
"Dugi ka ayeuna, geuning wasit katiten lepat ngaluarkeun kaputusan, utamana dina offside jeung onside," cek Teddy.
Sajaba ti meredih eta hal, Persib oge ngarojong pisan dilarapkeunana teknologi "Video Assistant Referee (VAR)" di kompetisi Liga 1.
Baca Juga: Wisata Kuliner di Kota Bandung, Iga Bakar Si Jangkung jeung Sate Gulai Kambing HM Harris
"Kanggo ngaminimalisir kalepatan wasit, VAR kedah saenggalna diterapkeun," pokna deui.
Sakumaha anu kasaksian, dina laga Persib vs PSM Makassar kamari memang aya sawatara kaputusan wasit patalina jeug offside anu kurang merenah. Anu sakuduna teu offside dioffsidekeun. Sabalikna, nu kuduna offside, henteu dioffsidekeun.
Eta hal, sajaba ti jadi sorotan komentator televisi nu nyiarkeun laga Persib vs PSM Makkasar, oge para netijen di media sosial, boh Twitter, Facebook, boh Instagram.
Netijen utamana bobotoh, saur manuk nyebutkeun yen wasit nu mingpin laga Persib vs PSM Makassar ngarugikeun Persib. ***