Network
GALURA. CO.ID -Ngaranna teh peuyeum kroto, peuyeum ketan has Blok Ciluncat, Kampung Ciparay, Desa Ciparigi, Kecamatan Sukadana, Kabupaten Ciamis, Jawa Barat.
Beda jeung umumna peuyeum ketan, peuyeum kroto mah rasana semu haseum, henteu pati amis. Mun didahar keur cuaca panas matak seger.
Peuyeum kroto sarua dibungkus ku daun jambu, ngan daun jambuna dina gagangna keneh. Dina sagagang, peuyeum krotona aya nu tilu siki, lima siki, jeung tujuh siki.
Baca Juga: Ngarasionalkeun Nyangku, Panjang Jimat jeung Jamasan, Ngarumat Pusaka kudu Make Teknologi
Dina nyieunna oge teu sagawayah, kudu puguh waktuna. "Ngadamelna piopat atanapi pitilu dinten deui kana Jumaah Kaliwon," ceuk Agus, nonoman Ciluncat nu aktif dina budaya.
Tina kituna dina Jumaah Kaliwon peuyeumna geus asak. Peuyeum kroto biasana dijieun dina acara-acara nu tangtu. Upamana dina Merlawu di situs Sejarah Ciluncat, milangkala Kabupaten Ciamis, lebaran jeung sajabana.
Ma Iti, warga Ciluncat nu sok nyieunan peuyeum kroto nyebutkeun dina nyieun peuyeum kroto kudu dina kaayaan suci, boga wudu. Ti mimiti ngisikan beas ketan, nyangu, ngaragian jeung mungkusanana oge kudu boga wudu. Kitu deui neundeunna dina besek atawa pipiti.
Naonn sababna disebut peuyeum kroto? Sabab bentukna kawas sayang kararangge. Sayang kararangge dina daun nu ku kararanggena daunna diropea siga bungkus ketan. Dina sayang kararangge sok rea kroto, endog sireum.
Ku sabab betukna kawas sayang kararangge dingaranan wae peuyeum kroto. Di Kabupaten Ciamis mah geus kakoncara peuyeum kroto buatan Ciluncat teh. Ngan teu unggal waktu aya, teu kawas peuyeum ketan Kuningan.***
