Ku Sambel Cibiuk, Onta jeung Badewi Ngabelesat Lumpat

Geus nu tumpak tarapti, Baduwi nyingklakeun buntut onta. Plok sambel kana bujur onta, onta ngagurubug. Tétéjéh. Geus kitu, ber lumpat. Taya tapak-tapak mogok.

Badewi reuwas ningal ontana mabur. Kumaha nyusulna? Rét kana bungkusan. Aya eusian sadungkuk deui. Teu tata pasini, éta sésa sambel dikeduk ku leungeun kéncana.

Leungeun katuhuna nyingsatkeun gamis. Plok sambel kama bujurna. Ber Baduwi lumpat tarik nepi ka ontana kasusul.

Onta di Gurun Pasir Mekah. Dina folklor di Cibiuk, sambel cibiuk bisa ngalantarankeun onta nu ngedeprek mugen narah leumpang, ku sambel cibiuk ngadadak lumapt ngabelesat.*

Beuki sohor
Beuki dieu sambel cibiuk geus beuki sohor. Nyebar di sakuliah Nusantara. Didagangkeun di réstoran-réstoran badag. Najan rupa atawa warna (malah rasa) béda ti sambel cibiuk asli, tapi pada nganggap sambel cibiuk baé.

Nu penting, sambelna aya lada, da loba nu teu nyahoeun nu kumaha sambel cibiuk nu asli.

Baca Juga: Guha Pawon, Rebuan Lalay, Aya Nu Leueur jeung Bau, Manehna Surti...

Ceuk sababaraha kaol nu bisa dipercaya, sambel cibiuk téh hasil karya Syekh Jafar Sidik, hiji ulama nu nyebarkeum Islam di pakaleran Garut, abad ka-19.

Katelah ku sebutan Embah Wali, lantaran kalungguhanana satata jeung para wali séjénna nu nyebarkeun Islam. Katelah deuih ku julukan Sunan Haruman.