Network
GALURA -Goong Renteng Embah Bandong disebutna teh, gamelan pusaka nu ditabeuh sataun sakali: unggal muludan, 12 Mulud. Bareng jeung meresihan barang pusaka nu diteundeun di Bumi Alit Kabuyutan Lebakwangi, Desa Batukarut, Kecamatan Arjasari, Kabupaten Bandung.
Beda jeung barang pusaka sejenna nu diteundeun di Bumi Alit Kabuyutan Lebakwangi Kabupaten Bandung, Goong Renteng Embah Bandong mah diteundeunna di salahsahiji warga Lebakwangi.
Boh Goong Renteng Embah Bandong boh banda pusaka sejenna nu diteundeun di Bumi Alit Kabuyutan Lebakwangi diurus, dirumat ku Paguyuban Sasaka Waruga Pusaka nu kantorna di Lebakwangi Kabupaten Bandung.
Baca Juga: Dimimitian ku Ma Jaer, Revitalisasi Seni Umbul Mekar di Situraja Kabupaten Sumedang
Waditra Goong Renteng Embah Bandong: bonang, saron, béri, kecrék, kempul jeung goong. Sanggeus dikumbah jeung diberesihan, sarta geus dipernah-pernahkeun, teu langsung ditabeuh. Memeh ditabeuh distel heula larasna. Carana: waditra, dibagean handapna ditaplokan taneuh porang.
Nyalaraskeunana taneuh porang diteueul-teueulkeun ku panakol, terus diajaran, sanggeus sorana surup, karek dipasangkeun deui kana tempatna, kana ancak.
Nyurupkeunana biasana leuwih ti sakali, nu matak neueulkeun taneuh porangna oge leuwih ti sakali. Taneuh porang maksudna keur nutupan liang-liang laleutik dina waditra.
Ancakna diamparan ku daun cau manggala, unggal hiji waditra diamparan salambar daun cau manggala. Pangna diamparan daun cau manggala sangkan sorana leuwih genah.
Baca Juga: Seni Umbul di Kabupaten Sumedang, Asalna ti Indramayu jeung Cirebon
