Network
GALURA.CO.ID -Saha ari Sastrawinata? Inyana teh bupati nu ngarobah ngaran Kabupaten Galuh jadi Kabupaten Ciamis. Tina silsilah bupati-bupati Galuh, Sastrawinata lain rundayan Aria Jayanegara, bupati munggaran Kabupaten Galuh. Inyana lahir di Purwakarta, ngan dipaut ka puhuna mah masih rundayan Ciancang (Utama), salasahiji daerah bawahan Kabupaten Galuh dina awal-awal Galuh dikawasa ku Mataram.
Ceuk sakaol pangna Sastrawinata ngarobah ngaran Kabupaten Galuh jadi Kabupaten Ciamis pikeun meunggaskeun rundayan Aria Jayanegara, sangkan henteu jadi bupati. Anu dipilampah ku Sastrawinata kawasna luyu jeung kahayang Walanda. Walanda nganggap bupati Galuh rundayan Aria Jayanegara dianggap rea nu bahula ka Walanda.
Sastrawinata jadi bupati Galuh taun 1914, sabada Kusumasubrata, tilar. Walanda henteu ngangkat bupati anyar ti rundayan Kusumabrata, teu kawas samemehna. Tapi ti luar rundayan Aria Jayanegara, malah mah bupati Galuh saterusna didatangkeun ti Purwakarta. Turunan Kusumasubrata teu bisa nanaon.
Dua taun ngajabat bupati Galuh, taun 1916, Sastrawinata ngarobah ngaran Kabupaten Galuh jadi Kabupaten Ciamis kalayan disaluyuan ku Walanda. Ceuk sakaol deui, Sastrawinata nu lahir di Purwakarta, 27 Februari 1869, pangna ngaganti Kabupaten Galuh jadi Kabupaten Ciamis teh hayang nandeskeun, inyana narah dipatalikeun jeung silsilah bupati Galuh.
Ti taun 1916 taya deui ngaran Kabupaten Galuh. Padahal geus dipake ti taun 1636 mula nu memehna ngaran karajaan, Karajaan Galuh, sabada Karajaan Pajajaran runtag, tuluy jadi ngaran kabupaten sabada tatar Galuh dijajah ku Mataram. Jadi ngaran Galuh dipake kacida pisan lilana. Malah mah ti jaman Wretikandayun nu ngadegkeun Karajaan Galuh di Kendan (Cicalengka).
Sastrawinata jadi bupati Ciami ti tepi ka taun 1935. Dina jaman pamarentahanana di Kabupaten Ciamis komunis baruntak nu dipingpin ku Egom jeung Dirja. Ku pamarentah Hindia Belanda, Sastrawinata dileler Bintang Willes Orde. Sastrawinata oge dileler Bintang Tanjung jeung Stempel Singa. Inyana dianggap sukses nyulap rawa di wewengkon Cisaga jadi pasawahan.***
