GALURA -Alfred North Whitehead, salasaurang ahli pikir bangsa Inggris, dina bukuna “Science and the Modern World” (1967: 190) ngungkabkeun, yen agama teh dina dasarna mah nyaeta: “The expression of one type of fundamental experience of mankind”, salahsahiji wangun ungkaban dasar pangalaman manusia, cenah.
Pangaruh jiwa agama dina mangsa kiwari dianggap kurang mere kakuatan keur ngagerakkeun kahirupan manusa. Beda deui jeung jaman samemehna. Nurutkeun anggapan Whitehead, aya dua alasan poko anu nyababkeunana.
Kahiji, ayana stagnasi anu kaalaman dina kahirupan kaagamaan. Hal ieu, misilna bae ku lahirna konsep konservatismeu jeung absolutismeu agama. Padahal, ceuk Whitehead satuluyna, jiwa konservatismeu jeung absolutismeu agama geus dianggap tinggaleun. Teu sajalan reujeung konsep manusa moderen.
Baca Juga: Sastrawan Ajip Rosidi (1938 – 2020): Antara Masyitoh, Jante Arkidam, jeung Bagus Rangin
Dogma-dogma agama kudu dirumuskeun kalawan ngaliwatan aspek-aspek intelektual agama, lain bae ngan saukur make ngungkaban-ngungkaban rasa hate. Sabab, rasa hate mah mindeng salah dina ngungkabkeun fenomena-fenomena alam. Teu rasional.
Ku kituna, dina hal ieu konsep agama perelu make pamarekan (approach) teologi sistematis, salaku dasar ayana intelektualismeu. Sedengkeun, alesan nu kadua, nya eta henteu sajalanna antara ambahan “gambaran” Allah jeung gambaran manusa moderen.
Sacara tradisional, Pangeran digambarkeun “raja absolut”, anu sagala parentahna kudu dilaksanakeun. Tanpa reserve. Dina gambaran ieu ka-Mahakawasa-an Pangeran mindeng diangkat kalawan mutlak.
Padahal, dina gambaran manusa moderen mah Pangeran teh digambarkeun salaku substansi anu nyebarkeun kakuatan asih, cinta, anu mere lolongkrang kana kabebasan manusa keur manggul tanggung jawab moral jeung pribadina.
Baca Juga: Sompral, Suaban Ngandung Gambaran Kasombongan, Kudu Disinglar, Matak Cilaka
Pangeran dina konsep tradisional, numutkeun Whitehead, mangrupa Sang Khalik anu sipatna transenden. Maha sampurna, tetep, teu robah. Dina hal ieu, kalan-kalan Pangeran dianggap salaku substansi, pribadi anu teu ngandung rasa asih. Sabab, sagala titah jeung parentah-Na mutlak kudu dijalankeun ku manusa. Di deiu manusa teu bisa adu-tawar. Mutlak “iya”-na.
Gambaran Pangeran saperti kitu sabenerna mah papalingpang reujeung aspirasi manusa moderen, anu ngabogaan harga kabebasan jeung niley pribadi manusa. Supaya gambaran ieu tetep pengkuh aya dina manusa moderen, urang perelu ngarumuskeun konsep Pangeran anu sabenerna.
Alternatif keur ngarumuskeun konsep Kapangeranan tanya deui iwal ti ngajukeun hiji pamadegan anu disebut Panenteismeu. Istilah ieu dikaluarkeun ku Ch. Hartshorne, salah saurang murid Whitehead anu ngamekarkeun Teologi Proses.
Nurutkeun panenteismeu, sakabeh nu aya dina konsep Pangeran, saperti nu geus disebutkeun, ngandung dua aspek. Nya eta, aspek awali (primordial) jeung akhir (consequent).
Dina aspek primordial, Pangeran mangrupa wujud konseptual dina sakabeh kakayaan potensialitas absolut, hiji panataan sagala kamungkinan bentuk perwujudan konkrit (ingresion) “obyek-obyek abadi” dina proses konkresi “satuan-satuan aktual”.
Salaku perwujudan konseptual, Pangeran dina aspek primordial, ku Whitehead di-kategori-keun salaku, “free, complete, primordial, eternal”, tapi “actally, deficient, and unconscious”.
Baca Juga: Kampung Mahmud Bihari jeung Kiwari, Imah Panggung geus Langka
Sri gambaran Pangeran dina aspek “consequent” diwujudkeun ku sipat “determinant, incomplete, consequents, everlasting, fully actual, and conscious”. Dina aspek ieu, sacara teoritis teu bisa dipisahkeun, sabab mangrupa hiji “ideal opposites”.
Konsep panenteismeu diajukeun, sabab keur ngawujudkeun hiji pamikiran teologis keur ngungkulan sababaraha kalemahan nu aya dina konsep panenteismeu, anu teu cukup ngabedakeun konsep Pangeran jeung alam dunya, atawa konsep monoteisme anu ngabedakeun teuing antara Pangeran jeung manusa.
Sabab, Pangeran, numutkeun paham panenteismeu, henteu “di luar” atawa “di gigir”-eun dunya, tur henteu aya “satacan” dunya dijadikeun, tapi “berkoleratif” sarta aya babarengan jeung alam dunya.
Dina paham ieu Pangeran teu bisa dipiharti salaku “Anu sama sakali lain”, tapi salaku “The great companion-the fellowsufferer who unsderstand” (batur nu hade, batur saperjoangan anu ngarti).
Konsepsi Whitehead dina Kapangeranan sapertina loba meunang ilham tina dialog Plato, Timaeus. Dina dialog eta, unsur Kapangeranan di dunya dianggap ngabogaan prinsip “sauyunan”, anu bisa ngarobah kakacowan (chaos) ngajadi kasalarasan (cosmos).
Pangeran bisa oge dianggap salaku daya imanen anu sipatna persuasif dina proses tumuwuhna kreativitas. Lain hiji kakuatan transenden anu sipatna maksa (coersive).
Di bagean sejen dina bukuna, “Adventure of Ideas” (1967: 227), Whitehead nandeskeun yen, “We must concieve the Devine Eros as the active entertainment of all ideas, with the urge of their finite realization, each in its due season”.
(Urang kudu mimaham Cinta Pengeran salaku pamikiran aktif sakabeh gagasangagasan ku dorongan wujudna, masing-masing dina waktuna anu tepat).
Dina dimensi primordial, Pangeran geus mere acuan pangarahan umum keur proses ngawujudkeun diri (selfcreative act), satiap “satuan aktual”. Keur Whitehead satiap satuan aktual teh mangrupakeun “self-creating
creatur”.
Ku sabab kitu, ajaran anu ku Whitehead diajukeun teh disebut ajaran filsafat proses. Filsafat ieu ngandung kayakinan yen sakabeh barang, tatanen, ingon-ingon, manusa, malahan Pangeran sorangan, atawa singgetna mah sagala hal kanyataan nu aya di dunya, terus tumuwuh sacara dinamis.
Terus aya dina proses “ngajadi” (becoming). Kanyataan teu bisa dipandang salaku mesin, tapi salaku organismeu anu salawasna hirup. Kitu pamadegan Whitehead ngeunaan Pangeran jeung agama dina pamanggihna nu dianggap hebat tur modern ku para ahli pikir lianna, nu disebut “filsafat proses”.
Baca Juga: Di Leuweung Sancang Kawenehen keneh Maung Kajajaden
Dr. J. Sudarminta (1994: 113) netelakeun pamadeganana ngeunaan hal ieu. Sabab, konsepsi ngeunaan Pangeran teu bisa ditarima ku urang salaku umat Islam. Whitehead, misilna bae nolak gagasan tradisional ngeunaan Pangeran salaku Pencipta nu Maha Sampurna, tur nu Maha Kawasa, sarta “Nu Aya” sabregna sagala hal nu lian, dijadikeun.
Pangeran, dina pamanggihna, aya babarengan jeung alam, tur salawasna ngorelasi jeung alam. Whitehead nolak konsep “Ciciptaan” salaku “creatio ex nihilo”, atawa konsep Pangeran salaku Al-Khalik, nu ngabogaan kahayang bebas merdika keur nyiptakeun sagala hal dina “ketiadaan”.
Manehna ngaganti konsepsi ieu ku cara make konsep Pangeran salaku “Ciciptaan Awal” kreativitas. Pangeran sok sering disebut salaku prinsip konkresi, atawa salaku prinsip kateraturan gerak dinamika sakuliah alam semesta anu aya, bareng tur papada mibutuh jeung Pangeran.
Pangeran henteu ditolih salaku hal anu utama tur penting (al-walidah) dina sagala hal nu aya. Pangeran henteu Maha Sampurna, sabab masih keneh aya “kesatuan aktual” nu lian, nu nyiptakeun kagiatan manusa jeung alam.
Pangeran oge ngalaman hiji kagiatan nu disebut “proses”. Ngalaman parobahan sakumaha anu dialaman ku dunya. Henteu ngan sakadar dunya wungkul nu mibutuh Pangeran, tapi oge sabalikna. Pangeran oge mibutuh dunya. Kitu nurutkeun Whitehead.
Konsep ieu, ceuk Sudarminta, mangrupa konsep pamikiran nu ngorbankeun kanyataan transendensi Pangeran, demi ngan sakadar neken imanensi-Na Pangeran. Padahal, dua sipat ieu teu bisa dipisahkeun, sabab memang ayana di Pangeran wungkul.
Sakuduna urang teh nerangkeun Pangeran sacara saimbang. Ulah ngorbankeun transendensi bari imanensi diangkat luhur-luhur.*** Kenging DR. UNANG JUNAEDI (Penulis Buku “Berkenalan dengan Filsafat Ilmu” dan “Kamus Kecil Sosiologi-Antropologi, Sebuah Kompilasi”)