Network
GALURA.CO.ID -Kejaksaan Tinggi Jawa Barat netepkeun Kepala Badan Kepegawaian dan Pengembangan Sumber Daya Manusia Kabupaten Majalengka, Irfan Nur Alam, dugaan tersangka korupsi pembangunan Pasar Sindangkasih, Kemis 14 Maret 2024
Bupati manten Majalengka, Dr. H. Karna Sobahi, M.MPd., anu mangrupakeun bapana Irfan Nur Alam, nyebutkeun bakal ngajenan proses hukum anu keur lumangsung.
“Simkuring percanten bebenaran bakal kaungkab sagemblengna nalika proses huku lumangsung. Sadaya pihak bakal kagungan kasempetan anu sami kangge ngengingkeun kaadilan anu adil tur objektif,” ceuk H. Karna Sobahi dina pernyataan tinulis anu katampa ku Galura.
Baca Juga: Rajaban jeung Mieling Isra Mi'raj, Karna Sobahi Umajak ka Warga Majalengka Nyebarkeun Kahadean
Karna Sobahi ngelingan sakumna pihak kana pentingna nyepeng prinsip asas praduga tak bersalah dina ngalaksanakeun proses hukum naon wae.
“Simmkuring percanten, bebenaran bakal mendak jalanna nyalira. Sadaya fakta sareng bukti bakal diajengkeun sacara transparan. Dina waktosna bebeneran bakal kaungkab kalayan ebreh tur bengras," ceuk H. Karna Sobahi.
Karna umajak ka sakumna pihak pikeun sabar jeung mercayakeun proses hukum ka lembaga anu berwenang. Inyanna yakin kaadilan bakal ditanjeurkeun, tur bebenaran bakal jadi nu nangtukeun dina ieu kasus.
“Simkuring miharep supados penegakan hukum tiasa dilaksanakeun kalayan transparan sareng tanggel waler, teu aya kapentingan naon wae di satukangeun ditetepkeunana tersangka," ceuk H. Karna Sobahi.
Baca Juga: Karna Sobahi dina Pilkada Majalengka 2024, Manaskeun Mesin Partey jeung Relawan
Disebutkeun H. Karna Sobahi, inyana katut kulawarga ngarasa yakin, Irfan Nur Alam, teu salah dina tuduhan anu dialamatkeun ka dirina.
Inyanna oge percaya bebeneran bakal kaungkab sarta mampu ngabuktikeun Irfan teu salah kalayan bukti anu nembrak tur objektif.
“Minangka sepuh, simkuring bakal teras masihan rojongan moral sareng pangaping ka Irfan salami proses hukum lumangsung. Simkuring percanten kana kaadilan katut integritas sistem peradilan. Simkuring ngaraos yakin pun anak, Irfan, bakal ngengingkeun perlakuan anu adil saluyu sareng hukum," ceuk H. Karna.
H. Karna Sobahi oge umajak ka sakumna pihak, sangkan teu spekulasi kana ieu pasualan, sarta ngajak ngadagoan proses hukum anu keur lumangsung.
“Dina sasih Romadon ieu, sim kuring kalayan asma kulawargi nyuhunkeun pidu'ana katut rojonganna ti sakumna masarakat, supados sagala rupi cocobi enggal rengse. Simkuring sakulawargi mudah-mudahan dipasihan kasobaran sareng katabahan. Hatur nuhun kana perhatosanana," ceuk H. Karna Sobahi.*** Ayank R Sambara
