Network
GALURA.CO.ID -Ketua Yayasan Pondok Pesantren Cipasung Tasikmalaya, Dr KH Acep Adang Ruhiat cumeluk ka sakumna alumni Pondok Pesantren Cipasung sangkan ngabuleudkeun tèkad ngunggulkeun pasangan Anies Baswedan-Muhaimin Iskandar (AMIN) dina Pemilu 2024.
KH Acep Adang umajak ka sakumna alumni Cipasung di saban daerah, utamana di Jawa Barat sangkan bajoang sakuat tanaga ngunggulkeun pasangan AMIN nu dianggap mibanda kasang tukang nu hadè, bersih, jeung mibanda luang mingpin.
"Simkiuring umajak ka para alumni sareng network Pondok Pesantren Cipasung di mana waè ayana ngarèkèpkeun barisan sasarengan ngadukung tur ngunggulkeun pasangan AMIN dina Pilpres 2024," ceuk KH Acep Adang Ruhiat, Ahad 10 Desember 2023..
Baca Juga: Dialog Capres 2024 jeung PWI, Anies Baswedan: ‘Tong Méré Dahareun ka Buzzer’
Ceuk ieu adi Rois 'Am manten PBNU jaman Gusdur, KH Ilyas Ruhiat pasangan Anies Baswedan-Muhaimin Iskandar (Gus Muhaimin) teh representatif kaum santri tur mibanda komitmen kaislaman nu kuat.
KH Acep miharep para alumni Pondok Pesantren Cipasung jeung para santri di Indonesia teu dapon dina milih pamingpin nasional. Komo deui calon presiden jeung calon wakil presiden.
KH Acep nyebutkeun calon pamingpin nasional kudu nyunponan kriteria nu tangtu saperti amanah, cerdas, mibanda kasang tukang manjng katut profesional.
"Capres sareng cawapres ogè kedah ngagaduhan komitmen komunitas kaislaman jelas dugi ka engkèna upami kapilih mangka baris mampuh merjoangkeun kapentingan umat Islam jeung sakumna èlèmèn bangsa sèjènna," ceuk ieu tokoh Nahdlatul Ulama teh.
Baca Juga: Kasang Tukang Muhaimin Jadi Balon Wapres Anies Kawas Cai Ngamalir
KH Acep nyebutkeun figur Anies Baswedan calon presiden jeung.Muhaimin Iskandar calon wakil presiden geus nyumponan sababaraha kriteria dasar.
"Pa Anies sareng Gus Muhaimin ogè ngagaduhan luang nu lami, boh janten menteri boh janten gubernur. Duanana ogè kawentar ti anom aktif dina organisasi kaislaman. Janten simkuring saparakanca yakin arnanjeunna tiasa dipercaya, tur mampuh nyandak Indonesia janten negara maju," ceuk KH Acep.
Alumni Pesantren Cipasung, ceuk KH. Acep, jumlahna nepi kana ratusan rèbu urang tur sumebar ka saban wilayah kaasup di wilayah Bandung Raya, di sababaraha wilayah di Jawa Barat, samalah sumebar di sakuliah Indonesia.
Para alumni Ponpes Cipasung ogè mibanda rupa-rupa profesi, teu ukur jadi kiayi jeung ustadz.
"Seueur ogè alumni Cipasung nu janten pajabat pamarèntahan, anggota parlemen, pangusaha, para cendekiawan nu ageung pangaweruhna di saban daerah. Ku jejaring nu sakitu lega simkuring yakin aranjeunna tiasa janten elemen penting ngunggulkeun AMIN dina Pilpres 2024," ceuk KH Acep.*** Sopandi
