Network
GALURA -Sakur patani Kabupaten Bandung meunang bantuan hibah gedena Rp25 milyar. Dipasrahkeun ku Bupati Bandung di Gedung Oryza Sativa Dinas Pertanian Kabupaten Bandung di Soreang (06/04/203).
Jumlah patani di Kabupaten Bandung lobana 50.000 urang. Jadi saurangna meunang Rp500 rebu sewang. Tanpa aya potongan nanaon, oge henteu dipotong pajek.
Bupati Bandung Dadang Supriatna ngalaunching bantuan hibah keur patani Kabupaten Bandung nyebutkeun potensi sektor pertanian di Kabupaten Bandung aya kana 50%-na. Tina kituna, kawijakan tata ruang wilayah mentingkeun kawasan pertanian.
Baca Juga: Ketua KPU Kabupaten Bandung, Agus Baroya: Mungkin Pisan Aya Ulon-ulon nu Hayang Ngagagalkeun Pemilu
Ceuk Dadang, pangwangunan pertanian di Kabupaten Bandung jadi prioritas pamarèntah daerah, ieu wujud pamarèntah mihak ka patani. Pikeun kapentingan pertanian, Kabupaten Bandung medalkeun Perda No 10 taun 2021 ngeunaan Perlindungan dan Pemberdayaan Petani
Kabupaten Bandung miharep ayana bantuan hibah bisa dimangpaatkeun keur ngaronjatkeun hasil tatanèn. Bupati Bandung netelakeun kuaota bantuan hibah keur patani sakitu tèh masih kènèh kurang.
“Ageungna bantosan kanggo patani luyu jeung kamampuan anggaran Pemkab Bandung. Tangtosna taun-taun ka payun badè teras ditingkatkeun," pokna.
Ceuk Bupati Bandung, ieu bantuan teh wujud kadariaan pamarèntah Kabupaten Bandung merhatikeun para patani sangkan bisa ngamekarkeun usaha tanina. Malah Kartu Tani Sibedas geus dipasrahkeun ka patani.*** Sopandi
