Network
GALURA -Kepala Puskesmas Kecamatan Cisarua, Kabupaten Bandung Barat (KBB), dr. Asep Ahmad, ngajawab pananya Galura, netelakeun, kasus stunting atawa gangguan kana kamekaran bayi di wilayah Kecamatan Cisarua, kawilang rea pisan.
"Kanggo sasih Januari dugi ka sasih Februari 2023 ayeuna, di Kecamatan Cisarua KBB kacatet langkung ti 50 bayi diduga stunting," pokna dina sela-sela Bimbingan Pernikahan nu diluuhan ku 10 pasangan calon panganten nu lumangsung di rohangan Bale Nikah KUA Kecamatan Cisarua, Kemis (16/02/2023).
Asep Ahmad, netelakeun, kasangtukang euyeubna kasus stunting di wilayah Kecamata Cisarua KBB, ku lantaran orok ti mangsa dikandung tepika gumelar ka alam dunya, kakurangan asupan gizi jeung nutrisi.
Baca Juga: Ngolah Runtah Palastik di Desa Tugumulya, Kiwari Geus Make Mesin
"Di sisi sejen, nu janten ibuna, salami kakandungan kirang ngariksakeun kasehatan kandunganna ka Puskesmas," pokna. Bisa jadi, ceuk Asep, kurangna miara kasehatan, lantaran kolotna nu kurang nyaho kana pentingna Kesehatan Ibu dan Anak (KIA).
""Tiasa oge tina bangbaluh ekonomi nu kirang raharja," pokna. Tapi, cek Asep, sarebu alesan naon bae, kasehatan budak kudu jadi prioritas nu jadi kolot, kadaharan keur bayi sareng barudak kudu ngandung gizi.
"Balukar stunting, mentalitas budak baris kaganggu, otakna kirang cerdas, bakal geringan jeung ganguan kasehatan nu sejenna," ceuk staf KIA Puskesmas Cisarua, Diah Subadriah
Luyu jeung Peraturan Presiden No 72/2001, ceuk Diah, pihakna rukun gawe jeung KUA Kecamatan Cisarua, baris ngahangkeutkeun penyuluhan stunting ka masarakat. “Pangpangna warga nu bade nikah. Stunting kedah disinglar ti awalna," pokna.
Materi ti Puskremas Kecamatan Cisarua dina Bimbingan Pernikahan, ngawengku, reproduksi terpadu, imunisasi TT jeung konseling, kaasup materi dina nyinglar stunting.
