GALURA.CO.ID -Pj Bupati Majalengka, Dedi Supandi, jeung Kepala BPN Majalengka, Wendi Isnawan, masrahkeun sertifikat program Pendaftaran Tanah Sistematis Lengkap (PTSL) dibarengan ku Sekda H. Eman Suherman di Kecamatan Malausma, Rebo, (21/02/2024).
Pamasrahan Sertifikat PTSL dilaksanakeun sacara simbolis. Sertifikat PTSL teh jumlah sagemblengna 2.900 bidang tanah masarakat nu aya di 11 Desa di Kecamatan Malausma, Kabupaten Majalengka.
Dedi Supandi netelakeun Program Pendaftaran Tanah Sistematis Lengkap (PTSL) teh mibanda peran penting dina pangwangunan masarakat.
Baca Juga: TMMD ka-119, Kodim 0617/Majalengka Muka Jalan Sapanjang 3000 Meter jeung Ngabangun Fasilitas Umum
"Ku ayana program pengelolaan tanah ngalangkungan pendaftaran tanah sistematik, masarakat ngengingkeun legalitas oge kapastian hukum anu nangtayungan hak-hakna," ceuk Dedi Supandi.
Program PTSL oge ngarojong pemberdayaan ekonomi kalayan akses leuwih hade keur program pangwangunan jeung investasi, sarta keur mere dasar data perencanaan pangwangunan anu akurat.
"Sertifikat tanah janten buktos sah kapemilikan anu diangken ku pamarentah. Nangtayungan nu ngapimilik tanah tina potensi sengketa jeung tindakan ilegal," ceuk Dedi.
"Sertifikat tanah oge masihan akses langkung hade kangge program pangwangunan, bantosan pamarentah, sarta pelayanan perbankan sapertos masihan kredit ku jaminan tanah," ceuk Pj Bupati.
Baca Juga: Taun Ayeuna Pamarèntah Nargetkeun 70.000 Widang PTSL keur 55 Desa di Kabupaten Bandung
Kepala Badan Pertanahan Nasional (BPN) Kabupaten Majalengka, Wendi Isnawan miharep masarakat nu narima sertifikat keur ngecek identitas diri, lega tanah tur wates tanahna. Nalika aya kasalahan pengetikan dina sertifikat teu meunang dibenerkeun ku sorangan.
Inyana cumeluk, sangkan sertifikat anu geus ditarima diteundeun kalayan hade tur aman. Anapon kitu nalika rek dimangpaatkeun minangka sarana ngaronjatkeun karaharjaan ekonomi anu utama keur ngaronjatkeun modal usaha, eta leuwih hade deui.
"Ulah dugi sertifikat tanah digunakeu kangge kagiatan konsumtif," ceuk Wendi.
Dina taun 2024 ieu kuota program PTSL keur Kabupaten Majalengka nepi 40 rebu sertifikat.
Baca Juga: Program PTSL PM, BPN Majalengka Masrahkeun Sertifikat, Warga Mibanda Kapastian Hukum
"Jumlah sakitu tiasa nambihan sapertos taun kamari, kumargi realisasi program PTSL di Kabupaten Majalengka dina 2023 ngalangkungan udagan," ceuk Wendi.
Ceuk Ikin (47) warga Werasari ngarasa kawilang syukuran tur gumbira lantaran geus ngapimilik sertifikat tanah sacara gratis ti program PTSL BPN.
"Tanah sim kuring legana 27 meter persegi. Kirang langkung tilu sasih aya pengajuanana. Saumur hirup teu acan gaduh sertifikat tanah, ieu bumi pamasihan kulawargi," ceuk Ukin.
"Ngalangkungan program nu aya, sim kuring tiasa gaduh buktos kepemilikan sah anu diaku negara. Simkuring kacida bingahna," ceuk Ikin.*** Ayank R Sambara