GALURA –Anu diguar dina head line Galura cetak edisi V Juni 2023, medal Rebo, 28 Juni 2023, ngeunaan luluhur lembur Kertamulya, Desa Kertamekar, Kecamatan Tanjungkerta, Kabupaten Sumedang, Jawa Barat, dipikawanoh ku sebutan Buyut Alin, nu nagih jangi ka SDN Kertamulya, salasahiji SD Inpres nu dibangun jaman Presiden Soeharto.
Ceuk head line Galura cetak edisi V Juni 2023, taun 1970-an, waktu Presiden Soeharto keur tihothat ngamajukeun atikan, di antarana ngabangun SD Inpres, Desa Kertamekar nyadiakeun lahan keur SD Inpres nu ayeuna dingaran SDN Kertamulya. Lahanna meunang meuli ti salasaurang warga rundayan Buyut Alin. Eta lahan salasahiji lahan nu dibuka ku Buyut Alin, jauh jaman samemeh dijajah Belanda.
Dicaritakeun dina head line Galura cetak, waktu tokoh masarakat Desa Kertamekar keur ngariung, keur baradami, salasaurang ujug-ujug kasurupan atawa kasarumahan. Waktu ditanya nu kasarumahan teh ngaku Buyut Alin, meredih mun engke lahan dipake ku SD Inpres (ayeuna SDN Kertamulya), salasahiji program Presiden Soeharto, dina samen kudu nanggap gemyung.
Baca Juga: Di Daop 2 Bandung, KA Commuter Cibatuan 387 Panumpangna Dijejel
Kahayang nu ngaku Buyut Alin dienyakeun. Nu keur ngariung jangji unggal samen bakal nanggap gemyung. Unggal taun SDN Kertamulya dina karian samen, kenaikan kelas jeung perpisahan kelas 6, sok nanggap gemyung di sagigireun mintonkeun kasenian kreasi barudak.
Ti genep taun ka tukang, samen SDN Kertamulya teu nanggap seni gemyung. Kasenian nu pangahirna ditanggap teh bangreng. Waktu keur ujian ahir smester kamari, salasuarang siswa kasarumahan ku nu ngaku Buyut Alin sarta menta dina samen nanggap gemyung.
Tulisan sejenna dina Galura cetak edisi V Juni 2023, dina rubrik Nyuckruk Galur (Sejarah) medarkeun ngeunaan situs sejarah Ciluncat di Desa Ciparigi, Kecamatan Sukadana, Kabupaten Ciamis. Ieu situs aya patalina jeung Karajaan Galuh nu puseur karajaanana di Kawali.
Di situs Ciluncat aya opat makam. Salasahijina makam Kiayi Tanjung Karawang nu ceuk legenda di dinya asalna ti Karawang. Di situs Ciluncat oge aya Batu Pangsalatan jeung batu Yoni.
Rubrik Warna-warni medar ngeunaan Majalaya Kabupaten Bandung nu dijulukan Kota Delman. Tepi ka ayeuna, di Majalaya masih keneh rea delman, teu kaelehkeun ku angkutan pedesaan, angkutan pakotaan jeung ku ojeg.
Rubrik Macangkrama medar profil Riadi Darwis nu ngawanohkeun kuliner Sunda ka mancanagara. Lian ti eta aya tulisan ngeunaan Komunitas Ciwidey Creative Centre, komintas nu konsen kana ngamotekarkeun nu usaha kana ekonomi kreatif.
Saptu, 24 Juni 2023, di Gelora Bung Karno (GBK) Senayan Jakarta lumangsung mieling Bulam Bung Karno. Pamilon di antarana make dudukuy. Eta dudukuy teh ngahaja dikirim ti Majalengka, lobana 10 rebu.
Anu bade langganan Galura cetak, tiasa nepangan perwakilan PR atanapi agen koran. Tiasa oge langsung ka Redaksi Galura, Jalan Asia Afrika no 77 Bandung, ngahiji sareng Kantor Pusar PR Bandung. Telepon 022 4201634, ext 222.***