GALURA - Bupati Bandung Dadang Supriatna ngondang puluhan wartawan nu kabeungkeut dina Persatuan Wartawan Indonesia (PWI) Kabupaten Bandung ka rumah dinas (Rumdin) di Soreang, Kemis (9/2/2022) peuting.
Ieu ondangan téh dina raraga Tasyakur Bini'mat ngareuah-reuah Hari Pers National (HPN) 2023 tingkat Kabupaten Bandung.
Dadang Suptriatna ngawilujengkeun HPN 2023 ka insan pers. Numutkeun inyana, pers téh salasahiji mitra strategis Kabupaten Bandung. Ku lantaran bantuan pers, Kabupaten Bandung bisa kawas ayeuna.
"Sim kuring miharep sinergitas terus kabeungkeut dugi ka payunna," ceuk Dadang Supriatna.
Nurutkeun Bupati, loba kaberhasilan nu dihontal di Kabupaten Bandung ku peran pers. "Di antawisna salami sim kuring ngajabat 21 sasih, Kabupaten Bandung dilélér 130 pangajén,” pokna.
Baca Juga: Milu Ngareuah-Reuah HPN, Istri Pulisi Diajar Nyieun Video Jurnalistik
Ku lantaran salasahiji bantuan pers ogé, ceuk Dadang Supriatna, PAD Kabupaten Bandung ngaronjat luar biasa. "Nu kawitna Rp 960 miliar, dina Desember 2022 kahontal Rp 1,269 trilliun," cenah.
Undakna PAD di Rp 390 miliar ieu, nurutkeun Dadang Supriatna, lain perkara gampil dina kaayaan sasalad Covid-19. Tapi, cenah, Kabupaten Bandung bisa ngaréalisasikeun luyu jeung nu dipiharep.
IPM Kabupaten Bandung ogé, ceuk Bupati Bandung, ngaronjat ngaleuwihan target. Ngan, inyana ngaku dina indikator pendidikan masih can maksimal, tur baris terus ditarékahan.
"Sakali deui, wilujeng HPN 2023. Mugia kanca media langkung sukses, langkung nanjeur, sareng teras ngabantos ngawujudkeun Kabupaten Bandung nu bangkit, edukatif, dinamis, agamis, sareng sejahtera. Bedas!" ceuk Bupati Bandung.***
Baca Juga: Ngareuah-reuah HPN 2023 di Sumut, Karya Urang ‘Galura’ Asup Buku Antologi Puisi Wartawan