GALURA.CO.ID - Dalang Khanha Shandhika Ade Kosasih Sunarya (Giriharja 2 Putu) teh pinunjul Binojakrama Pedalangan Wayang Golek Purwa dua taun ka tukang di Sukabumi.
Kemis, 23 November 2023, Khanha Shandhika masrahkeun Bokor Mas Astagina, piala bagilir Binojakrama Pedalangan Wayang Golek Purwa ka panitia Binojakrama Padalangan Wayang Golek Purwa, di Gedong Budaya Soreang.
Khanha Shandhika, dalang nu mawakeun lalakon Karna Tanding dina Binojakrama Pedalangan Wayang Golek Purwa dua taun ka tukang ngawawadianan sangkan para pamilon Binojakrama Pedalangan Wayang Golek Purwa taun ieu bisa leuwih alus.
"Alhamdulillah dinten ieu simkuring masrahkeun Bokor ka Pepadi Jabar nu diwakilan ku Pepadi Kabupaten Bandung nu minangka panitia lokal. Simkuring miharep dina Binojakrama taun ayeuna kualitasna langkung saè, " ceuk Khanha Shandhika.
Ketua Pepadi Kabupaten Bandung, Dani Sugiri nètèlakeun pamasrahan Bokor Mas piala bagilir Binojakrama Padalangan sajalan jeung rèk dilaksanakeunana Binojakrama Pedalangan, dina 27-28 Nopvember 2023 .
"Sakumaha ka uninga, Binojakrama Pedalangan Wayang Golek Purwa taun ieu digelar 27 - 28 Nopember 2023," pokna.
Dani nyebutkeun kawajiban pinunjul Binojakrama dua samemehna, sateuacan Binojakrama dikawitan kedah masrahkeun Bokor Mas Astagina piala sang juara Biinojakrama Padalangan nu digelar di Sukabumi dua taun ka pemgker, " ceuk Dani.*** Sopandi