Network
GALURA.CO.ID. - "Diapresiasi ku wartawan mangrupa wujud apresiasi anu kalintang pikabungaheunana pikeun sim kuring mah, lantaran wartawan mah dina ngajén nanaon téh tanpa aya kapentingan,” ceuk Soleh Solihun, sutradara film Star Syndrome sabada nampa Piala Gunungan pikeun kategori Sutradara Terbaik dina acara Puncak Festival Film Wartawan Indonesia (FFWI) di Gedung PPHUI, Jakarta Selatan, 27 Oktober 2023.
“Hatur nuhun ka FFWI. Nyaan teu nyangka bakal nyangking tujuh penghargaan. Tangtu bungah binarung reueus, hasil gawé sadaya tim téh enya-enya aya hasilna,” ceuk Soleh Solihun, anu kungsi jadi wartawan musik majalah Rolling Stones téh.
Film Star Syndrome, film munggaran anu disutradaraan ku Soleh Solihun, dina FFWI taun ieu ngaborong penghargaan kategori Aktor Utama (Gilang Dirga), Aktris Utama (Kezia Aletheia), Penulis Skenario (Rino Sardjono), Penata Kamera (Fahmy J Saad), Penyunting Gambar (Ryan Purwoko), Sutradara (Soleh Solihun), jeung Film Terbaik Komedi 2023.
Baca Juga: FFWI 2023: Film ‘Qodrat’ Dilélér Piala Gunungan Emas
Malah, nasib film Star Syndrome téh saestuna kurang untung di bioskop. Ieu film ngan sababaraha poé diputer di bioskop, jaba éléh saéngan jeung film box office anu tayang dina waktu nu mareng, saperti Fast X tepi ka Guardian of The Galaxy, oge film horor lokal kayaning Kajiman: Iblis Terkejam Penagih janji, Spritit Doll, katut Jin Khodam.
“Film Star Syndrome mah rugi di bioskop tapi untung di panghargaan,” ceuk Soleh Solihun, seuri ngagakgak bari némbongkeun pialana pinuh kareueus.
Film Star Syndrome téh nyaritakeun saurang penyanyi, kalayan pesan moral anu kuat, nyaéta kudu waspada mangsana jaya, sabab bisa waé karirna téh langsung nyirorot kagantikeun ku nu anyar.***
Baca Juga: Shenina Cinnamon Munggaran Maén Komedi, Ngarasa Bungah Asup Unggulan FFWI 2023
