Network
GALURA-Wakil Ketua Komisi II DPR RI, Yanuar Prihatin, nyebutkeun dina sual ngurus sertifikat tanah mangsa baheula jeung ayeuna tangtu jauh bedana. Baheula mah beunang disebutkeun hese beleke.
Teu matak heran, ceuk Yanuar, lamun kiwari rea warga boga lahan anu henteu dilengkepan ku administrasi kapaimilikan lahan atawa anu disebut sertifikat tanah tea.
Sababaraha taun kaliwat, rea warga anu rumahuh ku sabab hese beleke dina ngurus sual sertifikat tanah. Aya sababaraha pasualan anu biasa karandapan ku warga dina waktu ngurus sertifikat lahan.
Contona wae, dina sual pendataan anu henteu jelas. Pon kitu deui dina sual waragad anu henteu jelas, samalah mahal deuih. Sertifikat tanah kakara diurus, lamun aya warga anu daftar ngurus sertifikat lahan.
“Sabada dibahas babarengan, cara ngurus sertifikat tanah teh kedah kolektif. Nya ku ayana reforma agraria ngurus sertifikat janten gampang,” ceuk Yanuar Prihatin, basa Sosialisasi Program Strategis Kementerian ATR/BPN, di Grage Resort Sangkan, Poe Saptu, 25 November 2023.
Enya, ceuk Yanuar, gampangna mah nyaeta ku cara kolektif tea ngaliwatan Pendaftaran Tanah Sistematis Lengkap (PTSL). Kabupaten Kuningan salah sahiji daerah panghadena dina sual ngurus PTSL di Jawa Barat.
“Ku margi kitu, tangtos kedah dideudeul ku masarakat boh pamarentah daerah. Ieu program strategis, penting kanggo ngagampangkeun ngadamel sertifikat tanah,” ceuk Yanuar.***
