Network
GALURA.CO.ID - Dina raraga mieling Hari Bhayangkara ka-78, Polres Majalengka ngaresmikeun pangwangunan sumur bor pikeun sarana air bersih di Desa Girimukti, Kecamatan Kasokandel, Kabupaten Majalengka, Rebo (26/06/2024).
Peresmian dilaksanakeun langsung ku Kapolres Majalengka, AKBP Indra Novianto, S.I.K., M.H., M.Si., CPHR.
Acara peresmian diluuhan ku Wakapolres Majalengka, Kompol Asep Agustoni, S.E., M.M., jajaran PJU Polres Majalengka, Pengurus Bhayangkari Cabang Majalengka, Kapolsek Kasokandel IPTU Yuda Irawan, S.H., Danramil Kasokandel Kapten Arh Dani Hamdani, Camat Kasokandel Dadang Rukmana, Kepala Desa Girimukti Maman Suparman, sarta tokoh masarakat, tokoh pemuda, tokoh agama, jeung warga Desa Girimukti.
Kapolres Majalengka, AKBP Indra Novianto, netelakeun peresmian sumur bor bagean ti program sosial Polres Majalengka keur mere kontribusi nyata ka masarakat dina raraga mieling Hari Bhayangkara ka-78.
"Dina dinten ieu, Polres Majalengka ngalaksanakeun bantuan sosial mangrupa peresmian pangwangunan instalasi air bersih sumur bor nu dibangun di tanah milik Bapa Jaenudin di Blok Kamuningsari II RT 001/RW 004 Desa Girimukti," ceuk Kapolres.
"Hal ieu mangrupikeun kapadulian ti Kepolisian Negara Republik Indonesia, hususon Polres Majalengka, kangge maparinan air bersih nu berkualitas," ceuk AKBP Indra Novianto.
Kapolres Indra Novianto miharep ieu kagiatan sosial bisa mere mangpaat tur mawa kabagjaan keur masarakat sabudeureun.
"Simkuring katut rengrengan miharep ieu bantosan tiasa ngaronjatkeun kualitas hirup masarakat Desa Girimukti dina jangka panjang," ceuk Kapolres Majalengka.
Masyarakat Desa Girimukti ngabageakeun hade peresmian sumur bor tur ngahatur nuhunkeun kana perhatian jeung bantuan ti Polres Majalengka.
