Network
GALURA.CO.ID - Sanajan geus teu jadi anggota DPR RI di Dapil IX Jabar, Kabupaten Sumedang, Majalengka jeung Subang (SMS), Maruarar Sirait nu kaluar ti PDIP tembong masih ngariksa konstituenna.
Saperti di Majalengka, politikus anu dipikawanoh ngaranna Ara teh ngabagikeun rebuan paket sembako keur warga Majalengka sarta ngabagikeun THR keur militansina.
Rebuan paket sembako anu dibagikeun keur warga Majalengka teh hasil gotong royong Ara jeung Koordinator relawan Sahabat Bang Ara, Dena Muhamad Ramdhan.
Baca Juga: Legislator Fraksi PDIP H. Dadan Konjala, SH, Miharep dina Milad ka 383 Kabupaten Bandung Leuwih Hade
"Alhamdulillah dinten ieu parntos dibagikeun 1.000 paket sembako ti Bang Ara kangge warga Majalengka," ceuk Dena, Salasa (09/04/2024).
Ceuk Dena, Ara teh wijaksana. Dina kituna, ceuk Dena, Ara moal ninggalkeun jasa simpatisanna anu geus marenganana salila ieu.
"Bang Ara negarawan sajati, wijaksana jalmina. Bang Ara moal dugi ka ngahilapkeun jasa jalmi-jalmi anu tos nyarenganana, sanaos anjeunna teu janten deui anggota DPR sareng teu mibada kapentingan pulitik," ceuk Dena.
"Kadeudeuh ti Bang Ara janten buktos anjeunna masih emut ka warga Majalengka," ceuk Dena anu oge Ketua KADIN Kabupaten Majalengka.
Rebuan paket sembako anu disalurkeun Sahabat Bang Ara lain ngan saukur dibagikeun ka kalangan militansina. Kalangan profesi jurnalis nepi budayawan oge meunang bagean.
"Paket sembako dibagikeun keur relawan Sahabat Bang Ara Majalengka, sakumna alim ulama, budayawan, seniman, KNPI, HIPMI, PWI, Media TV jeung Online, paguron luhur, Karang Taruna, Ibu-ibu senam, patani. Aya anu ti partey, Partai Gelora, Partai Garuda, jeung Partai PSI, katut Pemuda Pancasila," ceuk Dena.
Ngabagikeun paket dilaksanakeun kira-kira jam 14.00 WIB di GOR GMC Majalengka. Warga Majalengka tembong antusias nalika nampa 'THR' eta.
"Alhamdulillah hatur nuhun Bang Ara masih emut ka masarakat Majalengka. Pamugi Bang Ara sehat saterasna oge tambih dilancarkeun rejekina," ceuk salasaurang warga, Reno.*** Ayank R Sambara
