Network
GALURA.CO.ID -Jalan ti Ciamis tepi ka Cikijing tepi ka tapel wates Kabupatén Majalengka jeung Kabupatén Kuningan nu kaasup jalan Nagara téh pinuh ku péngkolan nu marites, jeung bari nanjak atawa mudun deuih.
Ti Tasikmalaya ka Ciamis mah jalan téh ngabulungbung, badag jeung lempeng, teu weléh diuma-omé, kawantu jalan nagara. Ieu teh jalur tengah nu nepungkeun Jawa Barat jeung Jawa Tengah.
Ti Ciamis ka kalér, méngkolna ti lebah Alun-Alun Ciamis pinuh ku jalan nu pungkal-péngkol. Antara Ciamis-Buniseuri jalan nanjak, mudun ti kalér mah, téh méngkolna marites. Ti Kawali tepi ka Panawangan méngkolna marites, maringkel, nu siga angka dalapan téh jumlahna aya opatna.
Baca Juga: Warga Kondangmekar Korban Urug di Blok Cipadung Jalan Nasional Cikijing-Kuningan, Ahirna Kapanggih
Juara dunia motor GP ogé sigana moal sanggupeun mawa motor dina kacepetan sajamna leuwih ti 150 kilométer.
Ti Panawangan tepi ka Cikijing jalanna ogé sarua pungkal-péngkol, ngaliwatan gawir jeung pasir nu lalungkawing. Ti tapel wates Kabupatén Ciamis, ti Gardu Panawangan, tepi ka Cikijing jalan karék bisa lempeng meueuseun.
Lempeng pisan mah kira-kira lima kilometer deui ka Cikijing, mapay pasawahan nu upluk-aplak, mun kabeneran hawana keur hadé mah atra katingal Gunung Ceremé.
Mun holna ti kidul manggih tanjakan atawa pudunan mun holna ti kalér bari pungkal-péngkol jeung nanjak atawa mudun ti tungtung kota Cikijing. Jalan téh mapay-mapay tonggong pasir, jalan nu rék atawa tas kaliwatan katempo ti jalan nu leuwih luhur.
Baca Juga: Motorna Kapanggih, Korbanna Acan, Urug di Jalan Nasional Cikijing-Kuningan
Puncakna mah di deukeut tapel wates Kabupatén Majalengka jeung Kabupatén Kuningan, di Kacamatan Darma.
Ti tapel wates Kabupatén Majalengka jeung Kabupatén Kuningan, tepi ka Kadugedé Kuningan, jalan ogé sarua deuih pungkal-péngkol ngan teu marites, jeung henteu ngaliwatan pasir nu lalungkawing.
Ti Kuningan tepi ka Cirebon jalan ngabalungbung, anu rada nanjak atawa mudun jeung rada pungkal-péngkol ti Ciperna, tempat pangulinan nu unggal malem Ahad teu weléh ramé.
Ti sisi Kota Cikijing atawa ti tapel wates Kabupatén Kuningan jeung Majalengka mémang jalan téh matak paur. Beulah tonggohna gawir ka beulah lebakna jurang nu patepung jeung jalan deui.
Sawatara waktu ka tukang kungsi urug di Blok Cipadung teu bisa diliwatan pisan. Ayeuna mah geus bisa diliwatan deui.***
