Network
GALURA.CO.ID -KPU Kabupaten Bandung ahirna bisa ngarèngsèkeun Rapat Pleno Rekapitulasi Penghitungan Suara Tingkat Kabupaten Bandung poèb Rebu, 6 Maret 2024 janari.
Samèmèhna, KPU kabupaten Bandung nargètkeun ngarèngsèkeun rekapitulasi 3 poè, ti tanggal 1 tepi ka 3 Maret pikeun sajumlah 31 kacamatan di Kabupaten Bandung.
Ngan rekapitulasi nu digelar di Hotel Sutan Raja Soreang teh, tug tepi ka poè ke 3 can kelar. Nya dituluykeun isukna dina poè kaopat.
Can kènèh rèngsè, nyèsakeun 2 kecamatan, antukna dituluykeun dina poè ka-5, pindah ka Kantor KPU Kabupaten Bandung di Jalan Sindangwargi, Kecamatan Soreang.
Ceuk Ketua KPU Kabupaten Bandung, Syam Zamiat Nursyamsy, nu nyababkeun elatna rekapitulasi tèh dina proses ngakurkeun data ti tingkat kecamatan jeung interupsi ti para saksi.
"Alhamdulillah ayeuna tos rèngsè. Rekapitulasi tos dibacakan di payuneun para parpol sareng Bawaslu. Finalisasina sateuacan ngalangkungan dinten, " ceuk Syam Zamiat, Rebo, 6 Marer 2024.
Total jumlah sora sah jeung teu sah di Kabupaten Bandung: 2.265.384 sora.
Keur sora Presiden jeung Wakil Presiden, pasangan nomer urut 01 meunang 636.793 sora.
Pasangan nomer urut 02 meunang 1.433.560 sora, ari calon presiden jeung calon wakil presiden nomer urut 03, meunang 150.241 sora.
Syam nyebutkeun, Parpol nu hadir geus nandatangan hasil beubeunangan sora. "Alhamdulillah nu dibacakeun sareng nu di print teu aya perbèntenan, " pokna.
Syam ngaku, sanggeus rekapitulasi, tuluy masrahkeun D hasil ka KPU Provinsi Jabar.
"Proses saatosna D hasil ngèsèr ka proprinsi. KPU Kabupaten Bandung rekapitulasi tingkat provinsi luyu jadwal, ti tanggal 6 tepi ka 10 Maret 2924," ceuk Syam Zamiat.*** Sopandi
