Network
GALURA-Aya 60 urang anggota satuan kerja (Satker) Baladhika Korps Pegawai Republik Indonesia (Korpri) Kabupaten Kuningan, anu miluan pendidikan dan latihan (diklat) mitigasi bencana, di Bumi Perkemahan Palutungan, Desa Cisantana, Kecamatan Cigugur.
Salila dua poe, poe Rebo jeung Kemis 13 nepika 14 Desember 2023, maranehna nampa pangaweruh patali ngungkulan musibat alam, utamana dina nyangharepan
bencana meteorologi banjir, longsor jeung pergerakan tanah di ieu daerah.
Kepala Pelaksana Badan Penanggulangan Bencana Daerah (BPBD) Kabupaten Kuningan, Indra Bayu Permana, nyebutkeun pangaweruh anu ditepikeun ka para anggota Satker teh ti antarana wae ngeunaan cara nulungan korban jeung ngawanohkeun alat SAR.
Baca Juga: Miara Kaarifan Lokal, Ayip Sutrisno : Perlu Komunitas Kamanusaan Anu Tanggoh
Sajaba eta, oge simulasi vertical rescue, ice breaking, dinamika kelompok, kesamaptaan Hiking jeung anu sejenna deui.
Samemehna, Dewan Pembina Korpri Kabupaten Kuningan ngabentuk Satker Baladhika. Tujuanna pikeun milu aub ngungkulan pasualan anu raket patalina ngungkulan musibat alam di Kabupaten Kuningan.
Nurutkeun Indra Bayu, Satker Baladhika Korpri Kabupaten Kuningan teh mangrupakeun bagean tina relawan penanggulangan bencana.
Dipiharep mampuh jadi bagean dina waktuna proses ngungkulan kabencanaan, boh samemeh boh sabada kajadian musibat alam.
“Ieu tarekah kanggo ngaronjatkeun ngungkulan bencana, ngirangan risiko balukar atanapi dampak bencana di Kabupaten Kuningan,” ceuk Indra Bayu.
Sajeroning kitu, Ketua DP Korpri Kabupaten Kuningan, Dian Rachmat Yanuar, nyebutkeun Satker Baladhika mangrupakeun pasukan serbaguna, dibentuk dina tarekah ngungkulan bencana.
