GALURA.CO.ID -Bupati Bandung Dadang Supriatna ngintruksikan sangkan para aparatur sipil negara (ASN) di lingkungan Pemkab Bandung jadi bapa atawa indung kukut ti budak nu katarang stunting jeung nu kakandungan.
Kituna tèh ditètèlakeun Dadang Supriatna basa Sosialisasi Percepatan Penurunan Stunting di Pontren Sa'adatuddaroin, Kecamatan Solokanjeruk, Ahad 26 Nopember 2023.
Bupati lBandung meredih rukun gawè ti sakum pihak, utamana para kepala desa, patali data nu kacida dibutuhkeun, kira-kira aya sababaraha hiji titik lokus " by names by address" di saban desa, patali kaayaan budak stunting jeung ibu hamil.
Baca Juga: DKPP Kabupaten Bandung Pinunjul 1 SPHP Award Tingkat Provinsi Jabar
"Kudu aya bapa angkat sareng ibu angkat ti murangkalih nu stunting sareng ibu hamil. Urang bagi, jumlah ASN Kabupaten Bandung aya kana 18 rèbuna," ceuk Dadang Supriatna.
Ceuk Dadang, teu nutup kamungjkinan para kepala desa ogè baris diperedih pikeun jadi bapa angkat jang nurunkeun stunting. Danget ayeuna, tarèkah nurunkeun stunting Kabupaten Bandung terus diilakukeun.
Salah sahijina ku nambah anggaran APBD 2024. Lamun anggaran tina APBD teu cukup jang nurunkeun prevalensi stunting di Kabupaten Bandung, ceuk Dadang Suprtiatna kudu aya jalan sèjèn.
“Upami tina APBD urang sesah ketok palu sareng upamina teu cekap, simkuring nyuhunkeun kasadaran ka para ASN kanggo janten bapa atanapi ibu angkat kanggo masihan gizi. Tapi titik sasaranna jelas,” ceuk Dadang Supriatna.
Bupati ngajelaskeun, jadi bapa angkat sapoèna diperlukeun biaya kana Rp 21 rèbu salila 120 poè jeung ibu hamil. Sawatara jang orok kakarèk brol kana Rp16.500 saban poèna salila 56 poè.*** Sopandi