Network
GALURA.CO.ID -Teu jadina Ketua Umum Partai Demokrat, Agus Harimurti Yudhoyono (AHY) jadi pasangan bakal calon wakil presiden di Koalisi Perubahan, dianggap ku Ketua Majelis Tinggi Partai Demokrat, Susilo Bambang Yudhoyono (SBY) minangka musibah politik.
Ceuk SBY, ayeuna Demokrat boga jalan ngagabung jeung Koalisi Indonesia Maju (KIM) nu ngajurung Prabowo jadi bakal calon presiden, najan AHY can karuhan jadi bakal calon wapres.
Kituna tèh diitepikeun ku ieu Presiden RI ka-6 satutas ngayakeun gempungan jeung para anggota DPR, DPRD katut calon anggota DPRD ti Partai Demokrat di hiji rumah makan di Jalan Gading Tutuka, Kecamatan Soreang Kabupaten Bandung , Salasa (03/10/2023).
Baca Juga: Kasang Tukang Muhaimin Jadi Balon Wapres Anies Kawas Cai Ngamalir
Sabenerna ceuk SBY, teu aya nu robah sanajan Demokrat aya dina koalisi nu anyar: mertahankeun anu geus hadè jeung memener anu can hadè.
SBY ka Kabupaten Bandungna dibarengan ku Sekretaris Majelis Tinggi Partai Demokrat Andi Alfian Mallarangeng, Anggota Komisi IX Fraksi Demokrat DPR RI, Dede Yusuf, katut pupuhu Demakrat sèjenna.
Pikeun SBY mah, sajaba dina raraga kagiatan pulitik, ngalantona ka Kabupaten Bandung tèh mulangkeun panineungan waktu jeung istri nu dipijacintana almarhumah Ani Yodhoyono jeung AHY, katut Ibas Yudhoyono (IBY) ti heula mindeng ka Bandung, ngadon balakècrakan ngarasakeun nikmatna pasakan khas Sunda.*** Sopandi
