Network
GALURA.CO.ID. – Milangkala ka-45 Forum Komunikasi Putra Putri Purnawirawan dan Putra Putri TNI/Polri (FKPPI), PC 10.28 Kabupaten Bandung Barat ngagelar gempungan jeung jumpa kader.
Éta jumpa kader FKPPI PC 10.28 Bandung Barat téh lumangsung di Bumi Perkemahan Cengkrong, Rajamandala, Kabupaten Bandung Barat, Minggu (17/9/2023).
Jumpa kader dina raraga milangkala 45 taun FKPPI di tingkat PC 10.28 Kabupaten Bandung Barat diiluan ku sakumna Pangurus Cabang, Wanhat, Pangurus Rayon, katut réngréngan anggota ti sakuliah Kabupaten Bandung Barat.
Runtuyan kagiatan milangkala 45 taun FKPPI Tingkat PC 10.28 Kabupaten Bandung Barat mibanda téma “FKPPI Mempertahankan Keutuhan Bangsa untuk Mencapai Cita-cita Proklamasi”. Anapon organisasi FKPPI téh ngadeg ping 12 Séptémber 1978.
Ku kituna, momen milangkala 45 taun FKPPI téh sing bisa jadi pamecut pikeun PC 10.28 Kabupaten Bandung Barat terus ngagumelarkeun karya-karya nu positif tur aya kontribusina pikeun kamajuan bangsa.
Minangka bagéan unsur bangsa, KB FKPPI PC 10.28 Kabupaten Bandung Barat diperedih malar milu aub kalawan aktif, babarengan, keur ngahontal kamajuan daérah.
Baca Juga: Hengky Kurniawan, Mundur jadi Bupati KBB, rék Tetep Ngawujudkeun Desa Digital
Ketua FKPPI PC 10.28 Kabupaten Bandung Barat, Gaston Barus, mertélakeun, éta jumpa kader FKPPI téh antarana boga tujuan minangka sarana konsolidasi, pembinaan, sarta usaha nguatkeun KB FKKPI PC 10.28 Kabupaten Bandung Barat sangkan ayana ieu organisasi mawa mangpaat keur balaréa.
KB FKPPI PC 10.28 Kabupaten Bandung Barat diwengku 16 Pangurus Rayon di tingkat kacamatan, sarta 165 Pangurus Ranting di tingkat désa.
Tah, dina jumpa kader FKPPI PC 10.28 Kabupaten Bandung Barat harita ogé diwewegan ku ayana diskusi geusan ngaronjatkeun ajén kétak kader, boh kualitasna boh kuantitasna.
“Ku kituna dipiharep, sakumna kader FKPPI PC 10.28 Kabupaten Barat sing enya-enya mampuh ngarojong lumangsungna saniskara program organisasi, kalawan udagan babakti ka nagara jeung masarakat,” ceuk Gaston Barus.
Baca Juga: Mapella Unla dina Mapeling Mahasiswa Anyar, Nyalametkeun nu Kapahung di Lante 6
Anapon dina pembinaan, satekah polah terus digederkeun wawasan kabangsaan enggoning ngagumelarkeun sumber daya manusa nu teu weleh micinta lemah caina, katut tumuwuh sikep béla nagara.
Lian ti éta, ogé ngawangun hubungan rukun gawé jeung sakumna pihak, kaasup jeung unsur pamaréntah Kabupaten Bandung Barat, dina ihtiar babarengan ngamajukeun daérah.
“Pembinaan wawasan kabangsaan terus digederkeun, ogé pelatihan kapamingpinan jangeun tuwuhna karakter kamandirian jeung kompetensi di satengahing nyanghareupan persaéngan globalisasi,” ceuk Gaston Barus.
Laju manéhna miharep, ayana FKPPI PC 10.28 Kabupaten Bandung Barat téh sing bisa jadi tuladaneun balaréa dina milu aub ngarawat sarta ngajaga Negara Kesatuan Republik Indonesia (NKRI).
Baca Juga: Harepan Muhaimin Marengan Anies di Pilpres 2024 Disaluyuan ku PKS Tinekanan
Nu oge disawalakeun dina jumpa kader FKPPI PC 10.28 Kabupaten Bandung Barat téh nyaéta matéakeun rupaning poténsi nu bisa dimekarkeun pikeun kamajuan organisasi, kaasup poténsi paékonomian jeung sumber daya manusa nu sumebar di sababaraha widang.
Tah, optimalisasi kétak FKPPI PC 10.28 Kabupaten Bandung Barat téh bisa ngawujud mun sakumna réngréngan sapatékadan kana komitmen, kompak, turta solid.
“Minangka organsisasi badag, KB FKPPI kudu mampuh némbongkeun kétak ku cara ngagelar karya program nyata, maslahat keur balaréa. Ka hareupna ieu organisasi sing mingkin maju tur jaya, sarta tetep kompak enggoning ngawujudkeun udagan organisasi.***
