GALURA.CO.ID –Taun 2023 ayeuna Jawa Barat mibanda deui 13 karya budaya nu ku Kementerian Pendidikan dan Kebudayaan Riset Teknologi (Kemendikbud Ristek) RI ditetepkeun jadi Warisan Budaya Takbenda (WBTb) Indonesia.
Jawa Barat mibanda deui WBTb Indonesia dumasar sidang WBTb Indonesia nu digelar Kemis (31/8/2023) di Jakarta. Samemehna, 28 Februari 2023, Jawa Barat ngusulkeun 54 karya budaya pikeun dijadikeun WBTb Indonesia, anu disaluyuan ngan 13 karya budaya.
Dijumlah-jamleh tepi ka taun 2023 ayeuna Jawa Barat geus mibanda 156 karya budaya nu geus jadi WBTb Indonesia. Tangtu wae keur warga Jawa Barat pikareueuseun pisan.
Baca Juga: Jadwal Yogaswara Sunandar Sunarya Giriharja 3 Putra Bulan September 2023
Parelean 13 karya budaya asal Jawa Barat nu taun 2023 dijadikeun WBTb Indonesia:
- Azan pitu (Cirebon)
- Ajeng kasumedangan (Kabupaten Sumedang)
- Arumba (Jawa Barat)
- Brai (Kabupaten Cirebon)
- Bujangga dermayu (Kabupaten Indramayu)
- Krupuk mlarat (Kota Cirebon jeung Kabupaten Cirebon)
- Maenpo cikalong (Kabupaten Cianjur)
- Pengobatan tradisional raksa jasad (Kabupaten Sumedang)
- Ronggeng amen (Kabupaten Pangandaran)
- Sega jamblang (Kota Cirebon jeung Kabupaten Cirebon)
- Silat godot (Kabupaten Karawang)
- Tari buyung (Kabupaten Kuningan)
- Wajit cililin (Kabupaten Bandung Barat)
Sertifikat WBTb Indonesia nu dicangking ku Jawa Barat dipasrahkeun ku Gubernur Jabar Ridwan Kamil minangka wakil pemerintah pusat ka daerah asal WBTb waktu gelaran Karnaval Pekan Kebudayaan Daerah, di hareupeun Gedung Sate, Ahad (03/09/2023).
"Jumlah Warisan Budaya Takbenda nu diaku nasional Indonesia lolobana ti Jabar," ceuk Ridwan Kamil. Inyana miharep beuki lobana karya budaya Jawa Barat nu ditetepkeun jadi WBTb mecut sumanget pikeun ngamotekarkeun banda budaya nu aya di Jawa Barat.***