Network
GALURA-Aya kajadian anu ngondang kaprihatinan pikeun balarea, patali reujeung aya dua urang budak di Kuningan, umurna tacan sawawa, digadabah kahormatanna.
Samalah, tina dua budak anu digadabah teh hiji diantarana palakuna bapa terena. Budak anu hiji deui mah palakuna ku anu sejen.
Enya, boh korban boh palaku teh beda-beda. Pon kitu deui sual waktu jeung tempat kajadian.
Ceuk Kapolres Kuningan, Ajun Komisaris Besar Polisi (AKBP) Willy Andrian, budak anu digadabah ku bapa terena kajadianna teh tilu bulan katukang, pancegna 9 Februari 2023, kira wanci tabuh 22.00 WIB di kamar salah sahiji imah.
Palakuna inisial Y (42 taun), korban inisial N (14 taun). Katohian Y milampah teu uni, basa guruna nyaritakeun N ka indungna ceurik wae di sakola.
'Ditanyakeun ka jinisna, geus digadabah kahormatanna ku bapa terena," ceuk Willy, basa Konferensi Pers di Mapolres Kuningan, Rebo, (17/5/2023).
Ari nu hiji deui mah kajadianna bulan Mei 2023, di salah sahiji tempat wewengkon Kecamatan Sindangagung, Kabupaten Kuningan.
Palakuna inisial T (57 taun), korban inisial (14) taun. T ngolo K ku cara mere duit Rp 5000. Boh Y boh T Kiwari geus kacerek ku jajaran Reskrim Polres Kuningan.
"Kakara kaungkab ayeuna-ayeuna sanggeus pihak kapulisian nampa laporan ti pihak kulawarga korban," pokna.***
