Network
GALURA - Pemerintah Kabupaten (Pemkab) Bandung Barat meunang pangajen ti Kementerian Keuangan, minangka pinunjul hiji dina ngokolakeun Dana Alokasi Khusus (DAK).
Piagem pangajen dipasrahkeun di Kantor Pelayanan Perbendaharaan Negara (KPPN) Tipe A1 Bandung I, Salasa, (28/2/2023).
Ceuk Bupati Bandung Barat, Hengky Kurniawan, eta pangajen jadi pamecut sakumna stakeholder malar boga karep leuwih hade deui Dina sual ngokolakeun DAK fisik.
Baca Juga: Gempungan KB FKPPI PC 10.28 Bandung Barat, Maheutkeun Konsolidasi Pembinaan Kapangurusan Organisasi
"Ieu pangajen berekah kanggo Pemkab Bandung Barat, jadi panyumanget geusan ngaronjatkeun ketak nu leuwih hade," pokna.
Kacangkingna pinunjul DAK Fisik teh teu leupas tina koordinasi Jeung kolaborasi sakumna Organisasi Perangkat Daerah (OPD) nu nampa pangleler.
Salila ieu ge manehna teu weleh cumeluk malar sakabeh OPD di Pemkab Bandung Barat gawe rancage dina ngokolakeun DAK fisik.
Ceuk Hengky, modal kasuksesan teh dibarengan koordinasi jeung kolaborasi.
Hengky nyontokeun, lamun dina taun kahiji nalika nampa DAK, hartina di taun eta keneh kudu geus koordinasi jeung OPD nu nampa DAK.
"Maksadna dangkan sadayana pas waktuna, pas ancoanana, nyumponan pasaratanana,"
Manehna ge ngahaturkeun nuhun ka KPPN nu salila ieu teu weleh ngarespon katut ngaping dina perkara ngokolakeun DAK.
"Cindekna, ka OPD nu nampa DAK sangkan bisa migawena jeung ngalaporkeunana kalawan pas waktuna, hasilna luyu jeung ancoanana, kaasup dina proses pengadaan barang jeung jasa ge sing luyu jeung aturan," ceuk Hengky.
Sajeroning kitu, Kepala Kantor Pelayanan Perbendaharaan Negara Tipe A1 Bandung, Ade Permadi mertelakeun, pangajen kana ngokolakeun DAK Fisik nu dilakukeun ka Pemkab Bandung Barat teh dilakonan kalawan sagemblengna.
Hasil jeung efektivitasna diajen. Lian ti eta,oge diajen waktu laporanana katut administrasina.
"Tah, tina hasil pangajen teh dina taun 2022 di tingkat Provinsi Jawa Barat, Kabupaten Bandung Barat meunangkeun pangleler pinunjul kahiji dina hal ngokolakeun DAK Fisik. Muga wae taun 2023 bisa leuwih hade deui," ceuk Ade Permadi. ***
