Network
GALURA - Dandim 0618 Kota Bandung, Kol. Inf Donny I Bainuri, ngajurungkeun 150 prajuritna ngabantuan Pemkot Bandung nartibkeun kawasan Masjid Al Jabbar, Jumaah, 24 Februari 2023.
Pangna Dandim 0618 Kota Bandung nitah 150 prajuritna keur ngabantuan Pemkot Bandung lantaran lelewek Masjid Al Jabbar nu perenahna di Gedebage, Kota Bandung teh, ti saprak diresmikeun 30 Desember 2022 teu weleh rame ku nu ngadongdon sarta nu daragang (PKL).
Ku kituna di kawasan sabudeureun Masjid Al Jabbar meh unggal poe patalimarga macet. Nilik eta kaayaan, Dandim 0618 Kota Bandung getapan milu aub ngabantuan Pemkot Bandung kalawan ngerahkeun 150 prajuritna nartibkeun kawasan Masjid Al Jabbar.
Nartibkeun PKL ku cara persuasif jeung humanis. Ku kituna, paraPKL antukna bisa narima tur paham kana arahan prajurit Kodim 0618 Kota Bandung, sarta daek pindah ka tempat sejen nu geus disiapkeun.
"ParaPKL nu aya di kawasan Masjid Al Jabbar teh kadieunakeun mingkin nambahan, antukna patalimarga jadi macet, kaayaan jadi teu tumaninah. Ku kituna, Kodim 0618 karep ngabantu Pemkot Bandung nartibkeun eta PKL katut mindahkeunana ka tempat nu geus disadiakeun," pok Kol. Inf Donny I Bainuri.
Dumasar Perda Kota Bandung Nomer 4 Taun 2011 ngeunaan Pembinaan dan Penataan PKL, masjid teh zona merah nu hartina teu meunang aya lokasi PKL.
"Simkkuring cumeluk tur umajak ka paraPKL malar taat kana aturan, ulah ieuh dagang di kawasan masjid," ceuk Dandim 0618 Kota Bandung.
Dandim ngahaturkeun nuhun ka paraPKL nu geus kalawan sadar nurut kana umajak aparat sangkan dagangna pindah.
"Urang babarengan sauyunan ngajaga katartiban jeung kaasrian, katut katumaninahan kawasan Masjid Al Jabbar, masjid kareueus warga Jawa Barat," ceuk Kol. Inf Donny I Bainuri.***
