GALURA.CO.ID -Bupati Bandung, Dadang Supriatna, merenahkeun batu munggaran
renovasi Masjid Jami Al Jihad RW 09 Desa Lengkong, Kecamatan Bojongsoang, Kabupaten Bandung, Senen, 22 April 2024
Harita Bupati Bandung dibarengan rèngrèngan Forkopimcam Bojongsoang, jeung sajumlah kepala desa, katut tokoh masyarakat jeung tokoh agama. Bupati umajak ka masarakat pikeun ngama'murkeun masjid.
Dadang Supriatna ogè umajak ka para agnia jeung pangusaha sangkan aub ngamodalan renovasi masjid. Inyana nyontokeun di wilayah Lombok, masjid téh araragreng tur sumebar di saban RW.
Baca Juga: Korsi di DPRD Ngurangan, Ketua DPD Gerindra Kabupaten Bandung Teu Pede Nyalonkeun Dirina Jadi Bupati
"Di urang mah masjid ageung tèh paling-paling di tingkat kecamatan. Kitu ogè arang. Padahal seuseueurna masarakat Kabupaten Bandung muslim," ceuk Dadang.
Ku lantaran kitu, Dadan ngaku ngarasa kacida reueus jeung bungah mun seug aya Ketua DKM jeung kulawarga besar masjid aya niat memener masjidna.
Dadang Supriatna kacida ngarojong ayana renovasi masjid nu aya di sabudeureun RW atawa desa di Kabupaten Bandung.
"Dugi ka danget ayeuna, ti kawit simkuring janten Bupati Bandung, kana tilu taunna tos rèbuan masjid dibantos renovasina," ceuk Dadang Supriatna.
Baca Juga: Anggota DPRD Kabupaten Bandung Elin Batinna Sugemaeun Lamun Aspirasi Warga Kacumponan
Inyana ogè cumeluk ka sajumlah pihak sangkan guyub rampak gawè dina program pentahelix. "Utamina para agnia, para pangusaha, supados sasarengan midamel kasaèan," ceuk Bupati Bandung.
"Saparantos jalmi ngantunkeun alam dunya bakal pegat sadaya amalna kajabi tilu perkara, nu salasahijina shodaqoh amal jariiyah. Di antawisna ngabantos pangwangunan masjid, amal jariyah nu moal pegat pahalana," ceuk Dadang Supriatna.
Kepala Desa Lengkong, Kecamatan Bojongsoang, Agus Salam Rahmat, nganuhunkeun ka Bupati Bandung nu geus merenahkeun batu munggaran renovasi Masjid Jami Al Jihad jeung kana pangrojongna.
Agus umajak ka masarakat pikeun ngadukung program-program prioritas Bupati Bandung nu nuluy tur geus karasa mangpaatna ku masarakat. *** Sopandi