GALURA.CO.ID. - Otoritas Jasa Keuangan (OJK) ngalélér pangajén (panghargaan) ka Pikiran-Rakyat.com dina acara “OJK Apresiasi Media Massa 2023” anu diayakeun poé Senén, 27 November 2023 di Jakarta. Panghargaan dipasrahkeun dina kategori Media Daerah Terproduktif di 2023.
Ketua Dewan Komisioner Otoritas Jasa Keuangan (OJK) Mahendra Siregar nétélakeun, éta acara pamasrahan panghargaan téh minangka wujud apresiasi OJK ka media massa anu ngajaga akuntabilitas jeung pertanggungjawaban lembaga pengawas sektor jasa keuangan ka masarakat.
Éta acara pangajén (panghargaan) téh, ceuk Mahendra Siregar, munggaran pisan diayakeun ku OJK. Ku ayana éta panghargaan, Mahendra miharep bisa jadi jambatan jeung ngalaksanakeun akuntabilitas katut tanggung jawab ka masarakat.
"Pangna ieu acara apresiasi diayakeun, margi tanpa ayana éta bakal langkung sesah ka sim kuring sabatur-batur dina ngalaksanakeun tanggung jawab akuntabilitas. Margi penilaian ahir tina hiji periode sapertos pejabat lembaga nagara, sapertos OJK ieu, nyoko kana masalah geus dugi ka mana akuntability-na tiasa ditilik tur diukur sacara langsung," ceuk Mahendra dina biantarana.
Dina éta acara apresiasi, OJK méré pangajén dina sababaraha kategori. Aya Media Pemberitaan Online Terproduktif, Media Pemberitaan Terkontributif Literasi Keuangan dan Pelindungan Konsumen, Media Pemberitaan Foto Terproduktif, Media Pemberitaan Televisi Terproduktif, Media Pemberitaan Daerah Terproduktif, Media Pemberitaan Cetak Terproduktif, katut Media Pemberitaan Terkontributif Stabilitas Sektor Jasa Keuangan. Kabéhna aya 36 média anu meunang pangajén téh, dumasar kana pangimeut ti Tim Humas jeung internal OJK.
Pikiran-Rakyat.com jadi salasahiji media anu meunang pangajén OJK Apresiasi Media Massa 2023. Anapon pangajén (panghargaan) anu ditarima, nyaéta tina kategori Media Online Daerah Terproduktif.
Baca Juga: Pernyataan Sikap Forum Redaksi PRMN: Situasi di Palestina, Kolonisasi jeung Genosida
Panghargaan dipasrahkeun ku Kepala Eksekutif Pengawas Lembaga Pembiayaan, Perusahaan Modal Ventura, Lembaga Keuangan Mikro dan Lembaga Jasa Keuangan (PVML) OJK ka Aldiro Syahrian, Kepala Biro Jakarta Pikiran-Rakyat.com.
Kepala Pengawas Perilaku Pelaku Usaha Jasa Keuangan, Edukasi, dan Pelindungan Konsumen OJK Friderica Widyasari Dewi ngajelaskeun, sapanjang taun 2023 bakal aya leuwih ti 69 rébu warta (pemberitaan) tumali OJK.
Lian ti éta, Friderica nétélakeun, sapanjang taun 2023 OJK geus ngalaksanakeun 349 kagiatan, ngawengku siaran pers anu eusina hasil rapat bulanan Dewan Komisioner OJK, siaran pers, ogé rupa-rupa kagiatan séjénna, boh nasional boh daérah.
“Dina ieu kagiatan, dipiharep sinergi sareng rukun gawé antara OJK sareng média massa tiasa teras dironjatkeun kalayan tetep ngarojong independensi sareng kabebasan pers. Iwal ti éta, pemberitaan-pemberitaan ogé dipiharep tiasa ngajaga stabilitas sektor dasar keuangan sarta ngaronjatkeun literasi inklusi keuangan katut perlindungan konsumen,” pokna.***
Baca Juga: Pepadi: Hadiah Rp 90 Juta keur Juara Binojakrama Padalangan Wayang Golek Purwa Kakarèk Ayeuna